स्याङ्जा जिल्ला अदालतबाट विभिन्न कसुरमा जरिवाना तोकिएर फरार रहेका तीन जना प्रतिवादीलाई प्रहरीले पक्राउ गरेको छ ।
जिल्ला प्रहरी कार्यालय स्याङ्जाबाट खटिएको टोलीले बिहीबार खोजतलासका क्रममा उनीहरूलाई पक्राउ गरी जरिवाना असुलका लागि जिल्ला अदालतमा बुझाएको हो ।
जिल्ला प्रहरी कार्यालयका सूचना अधिकारी प्रहरी नायब उपरीक्षक रमेशदत्त अवस्थीका अनुसार पक्राउ पर्नेमा माना चामलसम्बन्धी कसुरमा जरिवाना तोकिएका एक जना, डाँका चोरी कसुरका एक जना र चेक अनादर कसुरका एक जना छन् ।
माना चामल कसुरमा एक जनाबाट दुई हजार चार सय ३० रुपैयाँ, डाँका चोरी कसुरमा एक जनाबाट पाँच सय रुपैयाँ र चेक अनादर कसुरमा एक जनाबाट तीन हजार रुपैयाँ जरिवाना असुल गर्नुपर्ने थियो ।
तीनै जनाबाट कुल पाँच हजार नौ सय ३० रुपैयाँ जरिवाना असुलका लागि बिहीबार नै स्याङ्जा जिल्ला अदालतमा बुझाइएको प्रहरीले जनाएको छ ।
