स्याङ्जाको बिरुवा गाउँपालिकामा पालिकालाई बुझाउनुपर्ने निकासी कर नतिरी कवाडी सामान ओसारपसार गरिरहेको अवस्थामा एउटा बलेरो जीप प्रहरीले नियन्त्रणमा लिएको छ ।
जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक रमेश दत्त अवस्थीका अनुसार बिहीबार प्रहरी चौकी बिरुवाअर्चलेबाट खटिएको टोलीले बिरुवा गाउँपालिका–१ बेलबारीमा चेकजाँच गर्ने क्रममा जीप नियन्त्रणमा लिएको हो ।
बिरुवाबाट स्याङ्जा सदरमुकामतर्फ आउँदै गरेको ना ३ च ७२४३ नम्बरको बलेरो जीप चेकजाँच गर्दा पालिकामा बुझाउनुपर्ने निकासी कर नतिरी कवाडी सामान ओसारपसार गरेको पाइएको प्रहरीले जनाएको छ ।
प्रहरीले जीप नियन्त्रणमा लिएर आवश्यक कानुनी कारबाहीका लागि बिरुवा गाउँपालिकाको कार्यालयमा बुझाएको थियो । गाउँपालिकाले जीपधनीलाई तीन हजार रुपैयाँ जरिवाना गराई छाडेको सूचना अधिकारी अवस्थीले जानकारी दिए ।
