स्याङ्जामा अवैध रूपमा बालुवा ओसारपसार गरिरहेका दुई वटा ट्याक्टरलाई प्रहरीले नियन्त्रणमा लिएर सम्बन्धित स्थानीय तहमा कारबाहीका लागि पठाएको छ । दुवै ट्याक्टरलाई जनही दश हजार रुपैयाँका दरले जरिवाना गरी छाडिएको छ ।
जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक रमेश दत्त अवस्थीका अनुसार प्रहरी चौकी दहथुम र अस्थायी प्रहरी पोस्ट दामाचौरबाट खटिएको टोलीले आइतबार अवैध रूपमा बालुवा ओसारपसार भइरहेको अवस्थामा ट्याक्टरहरू नियन्त्रणमा लिएको थियो ।
चापाकोट नगरपालिका–८ दामाचौरस्थित बनकट्टा घाटबाट लु ३ त ५२५३ नम्बरको ट्याक्टर नियन्त्रणमा लिइएको प्रहरीले जनाएको छ । उक्त ट्याक्टरलाई कारबाहीका लागि चापाकोट नगरपालिकाको कार्यालयमा पठाइएको थियो । नगरपालिकाले दश हजार रुपैयाँ जरिवाना गरेपछि ट्याक्टर छाडिएको सूचना अधिकारी अवस्थीले जानकारी दिए ।
त्यसैगरी, भीरकोट नगरपालिका–६ एकुवारबाट ग १ त ६१११ नम्बरको ट्याक्टर पनि अवैध रूपमा बालुवा ओसारपसार गरिरहेको अवस्थामा नियन्त्रणमा लिइएको थियो । उक्त ट्याक्टरलाई कारबाहीका लागि भीरकोट नगरपालिकाको कार्यालयमा पठाइएकोमा दश हजार रुपैयाँ जरिवाना गरी छाडिएको प्रहरीले जनाएको छ ।
प्रहरीले आइतबार नियन्त्रणमा लिएका दुवै ट्याक्टरलाई आवश्यक कारबाहीका लागि सोमबार सम्बन्धित पालिकामा पठाएको थियो । दुवै ट्याक्टरबाट गरी कुल बीस हजार रुपैयाँ जरिवाना असुल गरिएको छ ।
प्राकृतिक स्रोतसाधनको अवैध दोहन तथा ओसारपसार नियन्त्रणका लागि जिल्लाका विभिन्न क्षेत्रमा निगरानी र कारबाहीलाई निरन्तरता दिइएको प्रहरीले जनाएको छ ।
