स्याङ्जाको बिरुवा गाउँपालिकास्थित जंगल क्षेत्रमा लुकाइराखिएको अवस्थामा एकनाले भरुवा बन्दुक फेला परेको छ ।
जिल्ला प्रहरी कार्यालय स्याङ्जाका अनुसार बिरुवा गाउँपालिका–८ मेथाभुरुङस्थित जंगलमा भरुवा बन्दुक लुकाइछिपाइ राखिएको भन्ने सूचनाका आधारमा प्रहरी चौकी बिरुवाअर्चलेबाट खटिएको गस्ती टोलीले खोजतलास गरेको थियो ।
खोजीका क्रममा बन्दुकको नाल र बट फुटेको तथा छुट्टाछुट्टै अवस्थामा रहेको एकनाले भरुवा बन्दुक बरामद गरिएको जिल्ला प्रहरी कार्यालय स्याङ्जाका प्रहरी निरीक्षक अमृत त्रिपाठीले जानकारी दिए ।
बरामद गरिएको बन्दुकलाई नियन्त्रणमा लिएर थप अनुसन्धान तथा कानुनी प्रक्रिया अघि बढाइएको जिल्ला प्रहरी कार्यालय स्याङ्जाले जनाएको छ ।
प्रहरी निरीक्षक त्रिपाठीका अनुसार बेवारिसे अवस्थामा फेला परेको उक्त भरुवा बन्दुक कसले र किन त्यहाँ राखेको भन्ने विषयमा अनुसन्धान भइरहेको छ ।
