स्याङ्जामा चालू आर्थिक वर्षका केही महत्वपूर्ण विकास योजना बजेट अभाव र स्थानीय विवादका कारण अलपत्र पर्ने अवस्थामा पुगेका छन् । जिल्लाको पूर्वाधार विकाससँग जोडिएका योजना अघि बढ्न नसक्दा समग्र विकास प्रभावित हुने चिन्ता बढेको छ ।
आर्थिक वर्ष २०८२/८३ का लागि तय गरिएका १२१ योजनामध्ये १०३ वटा मात्रै कार्यान्वयनमा गएको पूर्वाधार विकास कार्यालय स्याङ्जाले जनाएको छ । आठ वटा योजना मूल्याङ्कनको अन्तिम चरणमा रहेका छन् भने १० वटा योजना भने अघि बढ्न नसक्ने अवस्थामा पुगेका हुन् ।
कार्यालयका निमित्त प्रमुख इन्जिनियर गुरुदत्त अधिकारीका अनुसार केही योजनामा पर्याप्त बजेट व्यवस्थापन हुन नसक्दा काम रोकिएको हो भने केही योजनामा स्थानीयस्तरको विवादले प्रक्रिया अघि बढ्न सकेको छैन ।
अलपत्र पर्ने योजनामध्ये ज्याग्दीखोला कोरिडोर विकास योजना सबैभन्दा ठूलो रहेको जनाइएको छ । करिब ६ करोड रुपैयाँ लागत अनुमान गरिएको उक्त योजना अझै निर्माण प्रक्रियामा जान सकेको छैन ।
त्यसैगरी, चार करोड रुपैयाँ लागतका छ वटा योजना विवादका कारण लागत अनुमानकै चरणमा अड्किएका छन् । बिरुवा–धोबादी हुँदै राङखोला जोड्ने सडक योजना पनि बजेट अभावकै कारण रोकिएको बताइएको छ । उक्त सडक योजनाको लागत अनुमान करिब तीन करोड रुपैयाँ रहेको छ ।
कार्यालयका अनुसार करिब दुई करोड रुपैयाँ लागत अनुमान गरिएका अन्य केही योजना संशोधन गर्नुपर्ने अवस्था र ठेक्का प्रक्रिया अघि बढाउन नसकिने कारण रोकिएका छन् । स्थानीय तहमा देखिएको विवाद र बजेट अभावले विकास निर्माणका काम प्रभावित बनेपछि नागरिकले समेत चासो व्यक्त गर्न थालेका छन् ।
