फागुन २१ गते हुने प्रतिनिधिसभा सदस्य निर्वाचन नजिकिँदै जाँदा स्याङ्जामा तयारी अन्तिम चरणमा पुगेको छ । मुख्य निर्वाचन अधिकृतको कार्यालयले शनिबारदेखि मतदानमा खटिने कर्मचारीलाई नियुक्तिपत्र वितरण सुरु गरेसँगै जिल्लाभर चुनावी माहोल तातेको हो ।
जिल्लाभरका १९९ मतदान स्थलअन्तर्गत ३२२ नियमित मतदान केन्द्र र एक अस्थायी मतदान केन्द्रमा कर्मचारी व्यवस्थापन पूरा गरिएको छ । जिल्ला कारागारमा रहेका कैदीबन्दीका लागि छुट्टै अस्थायी मतदान केन्द्र तोकिएको छ । मुख्य निर्वाचन अधिकृत उपेन्द्रप्रसाद गौतमका अनुसार प्राविधिक तथा प्रशासनिक सबै तयारी सकिएको छ ।
निर्वाचन क्षेत्र नम्बर १ मा खटिने कर्मचारीलाई मुख्य निर्वाचन अधिकृतको कार्यालयबाट र क्षेत्र नम्बर २ मा खटिने कर्मचारीलाई सम्बन्धित क्षेत्रीय निर्वाचन अधिकृतको कार्यालयबाट नियुक्तिपत्र वितरण भइरहेको छ ।
जिल्लाभर मतदान अधिकृत, सहायक मतदान अधिकृत र सहयोगी कर्मचारी गरी कुल १ हजार ९३५ जना निर्वाचन कर्मचारी परिचालन गरिएको छ । दुवै निर्वाचन क्षेत्रमा तीन/तीन जना मतदान अधिकृत र सहायक मतदान अधिकृत गरी कुल १२ जना निर्वाचन कर्मचारी जगेडाका रूपमा राखिएको कार्यालयले जनाएको छ ।
कर्मचारीहरूले नियुक्तिपत्र बुझिसकेपछि आ–आफ्नो मतदान केन्द्रमा पुग्ने कार्यतालिका बनाइएको छ । मतदान अधिकृतदेखि सहयोगी कर्मचारीसम्मलाई आवश्यक तालिम दिइसकिएको छ । अब मतदान प्रक्रिया सञ्चालन, मतपेटिका ढुवानी र मतगणनाको काम मात्रै बाँकी रहेको प्रशासनले जनाएको छ । मतपेटिका सुरक्षित ढुवानीका लागि छुट्टै कार्ययोजना तयार गरिएको छ भने आवश्यक निर्वाचन सामग्री तथा मतपत्र हस्तान्तरणको काम पनि सुरु भइसकेको छ ।
निर्वाचन क्षेत्र नम्बर १ अन्तर्गत हरिनास, बिरुवा, फेदीखोला, आँधीखोला, अर्जुनचौपारी गाउँपालिका, वालिङ (३ र ४), भीरकोट (१–४) र पुतलीबजार नगरपालिकाका १७१ मतदान केन्द्रमा खटिएका अधिकृतलाई जिल्ला निर्वाचन कार्यालयबाट सामग्री र मुख्य निर्वाचन अधिकृतको कार्यालयबाट मतपत्र वितरण भइरहेको छ ।
यस्तै, क्षेत्र नम्बर २ अन्तर्गत कालीगण्डकी गाउँपालिका, वालिङ (३ र ४ बाहेक), भीरकोट (१–४ बाहेक) र चापाकोट, गल्याङ नगरपालिकाका १५१ मतदान केन्द्रका अधिकृतलाई सम्बन्धित निर्वाचन अधिकृतको कार्यालयबाट सामग्री उपलब्ध गराइने जनाइएको छ । जिल्ला कारागारमा रहेका कैदीबन्दीका लागि तोकिएको अस्थायी केन्द्रमा पनि आवश्यक सामग्री पठाउने तयारी गरिएको कार्यालयले जनाएको छ ।
प्रमुख जिल्ला अधिकारी ईश्वरीप्रसाद अर्यालले सुरक्षा व्यवस्था मजबुत बनाइएको बताउँदै निर्वाचन शान्तिपूर्ण, व्यवस्थित र भयरहित वातावरणमा सम्पन्न हुने विश्वास व्यक्त गरे । कर्मचारी र सुरक्षाकर्मी परिचालन भइसकेको र जिल्ला सुरक्षा समितिले निर्वाचन सुरक्षा योजना कार्यान्वयनमा ल्याइसकेको उनको भनाइ छ ।
जिल्ला प्रहरी कार्यालय स्याङ्जाका प्रमुख प्रहरी उपरीक्षक दधिराम न्यौपानेका अनुसार निर्वाचनका लागि खटिने प्रहरीको कार्यस्थल निर्धारण गरी उनीहरूलाई सम्बन्धित मतदान केन्द्रतर्फ पठाइसकिएको छ ।
यसैबीच, आचारसंहिता अनुगमनका क्रममा हालसम्म लिखित र मौखिक गरी २५ वटा उजुरी परेको सहायक प्रमुख जिल्ला अधिकारी तथा आचारसंहिता अनुगमन अधिकृत प्रेम सुवेदीले जानकारी दिए । तीमध्ये केहीलाई लिखित स्पष्टीकरण मागिएको छ भने केहीलाई मौखिक रूपमा सचेत गराइएको छ । हालसम्म कुनै जरिवाना वा कडा कारबाही गरिएको छैन ।
जिल्ला सुरक्षा समितिले भौगोलिक अवस्था र सुरक्षाको मूल्यांकनका आधारमा ५६ मतदान स्थललाई अति संवेदनशील, ७१ लाई संवेदनशील र ७२ लाई सामान्य श्रेणीमा वर्गीकरण गरेको छ ।
स्याङ्जामा प्रतिनिधिसभातर्फ दुई निर्वाचन क्षेत्र रहेका छन् । क्षेत्र नम्बर १ मा एक लाख ३० हजार ८८६ र क्षेत्र नम्बर २ मा एक लाख १७ हजार ९३० मतदाता रहेका छन् । जिल्लाभर कुल दुई लाख ४८ हजार ८१६ मतदाता मतदानको प्रतीक्षामा छन् । निर्वाचनको तयारी पूरा भएसँगै अब स्याङ्जा मतदानको दिन कुरिरहेको छ ।
