स्याङ्जाको पुतलीबजार नगरपालिकामा सदरमुकाममै पहिलोपटक कपडा बैंक सञ्चालनमा आएको छ । शुक्रबार पुतलीबजार नगरपालिका –१ स्थित ट्याक्सी चोकमा कपडा बैंकको औपचारिक शुभारम्भ गरिएको हो ।
पुतलीबजार नगरपालिका–३ मा सक्रिय लत्रेपिपल क्लब र नगरपालिकाको साझेदारी तथा समन्वयमा कपडा बैंक सञ्चालनमा ल्याइएको हो । सामाजिक उत्तरदायित्वलाई संस्थागत रूपमा अघि बढाउने उद्देश्यले यो पहल गरिएको लत्रेपिपल क्लबका अध्यक्ष तथा कपडा बैंक कार्यक्रमका संयोजक मनोज मल्लले जानकारी दिए ।
कपडा बैंकको उद्घाटन गर्दै नगर प्रमुख तुलसीराम रेग्मीले लक्षित वर्गका नागरिकलाई आवश्यक कपडा सहज र सम्मानजनक रूपमा उपलब्ध गराउने उद्देश्यसहित यो अभियान सुरु गरिएको बताए । उनले समुदायको सहभागिताले यस्तो सामाजिक कार्यक्रम अझ प्रभावकारी बन्ने विश्वास व्यक्त गरेका छन् ।
कार्यक्रममा प्रमुख प्रशासकीय अधिकृत धर्मराज ढुंगाना, खुमा अर्याल फाउन्डेसन स्याङ्जाका अध्यक्ष लेखनाथ शर्मा, समाजसेवी विश्वराज मरासिनी लगायतले कपडा बैंकलाई दीगो रूपमा सञ्चालन गर्न स्थानीय समुदायको सक्रिय सहभागिता, नियमित संकलन, पारदर्शी व्यवस्थापन र स्वयंसेवक परिचालन आवश्यक रहेकोमा जोड दिए ।
शुभारम्भको अवसरमा संयोजक मल्लले घरघरमा प्रयोगमा नआएका तर लगाउन मिल्ने कपडा, झोला, जुत्ता लगायत सामग्री सफा गरेर दान गर्न आम नागरिकलाई आग्रह गरे। साथै, यसबारे जानकारी फैलाउन सबैलाई सहयोग गर्न अपिल पनि गरेका छन् ।
