स्याङ्जाको कालीगण्डकी गाउँपालिका -३ आलमदेवी देउरालीमा वडा स्तरीय खुल्ला पुरुष भलिबल प्रतियोगिता हुने भएको छ ।
विगत ३९ वर्षदेखि हरिबोधनी एकादशीको अवसरमा सञ्चालन हुँदै आएको प्रतियोगिता यस वर्ष पनि जनज्योति क्लबले आयोजना गरेको हो ।
क्लबका अध्यक्ष टोप बहादुर रानाका अनुसार कार्तिक १२ गतेदेखि हुने प्रतियोगिता लिग प्रणाली खेलाइनेछ र प्रतियोगितामा सहभागी हुने प्रत्येक टोलीमा ३ जना बाहिरका खेलाडी समावेश गर्न पाउनेछन् ।
प्रतियोगिताको विजेता टिमलाई एक लाख ३० हजार रुपैयाँ नगदसहित शिल्ड, मेडल र प्रमाणपत्र प्रदान गरिनेछ । दोस्रो हुने टिमले ८० हजार, तेस्रोले ४० हजार, र सान्त्वना टिमले २० हजार रुपैयाँ नगदसहित प्रमाणपत्र पाउनेछन् ।
त्यस्तै, वेष्ट प्लेयरलाई तीन हजार रुपैयाँ तथा विधागत पुरस्कार अन्तर्गत वेष्ट ब्लकर, सेटर, डिफेन्डर, स्पाइकर, सर्भर र कोचलाई जनही एक हजार पाँच सय रुपैयाँ नगद प्रदान गरिनेछ ।
जनज्योति क्लबका अध्यक्ष टोप बहादुर रानाले भने, “३९ वर्षको परम्परा निरन्तरता दिनु हाम्रो गर्व हो । यस पटक पनि स्थानीय टिमहरूको सहभागिताले प्रतियोगितालाई अझ आकर्षक र प्रतिस्पर्धात्मक बनाउने विश्वास छ ।”
उनले भने, “यो प्रतियोगिता केवल खेलकूद नभई गाउँबीच एकता, भाइचारा र स्वस्थ प्रतिस्पर्धाको माध्यम हो ।”
