‘जेन-जेड आन्दोलन’को क्रममा फरार भएका दुईजना कैदी स्याङ्जाबाट पक्राउ परेका छन् । जिल्ला प्रहरी कार्यालय स्याङ्जा र वडा प्रहरी कार्यालय वालिङबाट खटिएको संयुक्त प्रहरी टोलीले विशेष सूचनाका आधारमा उनीहरूलाई नियन्त्रणमा लिएको हो ।
गत भदौ २४ गते फरार रहेका कैदीहरूलाई असोज १९ गते पक्राउ गरी आवश्यक कानूनी कारबाहीका लागि जिल्ला कारागार स्याङ्जा पठाइएको प्रहरी निरीक्षक प्रवेश तिवारीले जानकारी दिए ।
उनका अनुसार पक्राउ परेकामध्ये एकजना वालिङ नगरपालिका –९ का ३५ वर्षीय मदन माझी र बिरुवा गाउँपालिका –६ का १९ वर्षीय अर्का व्यक्ति रहेका छन्, जसको नाम कानुनी कारणले गोप्य राखिएको छ ।
उनीहरू दुबै ‘जबरजस्ती करणी’ मुद्दाका दोषी ठहर भई कैद सजाय भोगिरहेका थिए । माझी काठमाडौंको केन्द्रीय कारागार जगन्नाथदेवलबाट र अर्का व्यक्ति बाल सुधार गृह पोखराबाट फरार भएका थिए ।
फरार व्यक्तिहरूलाई पक्राउ गर्नका लागि प्रहरीले लामो समयदेखि निगरानी राखेको बताउँदै प्रहरी निरीक्षक तिवारीले प्रहरीको संयोजन, सूचनाको प्रयोग र स्थानीय सहयोगकै कारण पक्राउ सम्भव भएको बताए । उनले भने, ‘फरार अपराधीहरू जसरी भए पनि कानूनी दायरामा ल्याइनेछन् ।’
प्रहरीले यसअघि काठमाडौं केन्द्रीय कारागारका फरार दुईजना, तनहुँ दमौली कारागारका एक जना र कास्की कारागारबाट फरार भएका तीनजना कैदीलाई पक्राउ गरेको छ ।
