स्याङ्जाको आँधिखोला गाउँपालिका –१ हिलेमा झुटो चोरीको निवेदन दिएर सुनका गरगहना तथा नगद रकम लुकाएको आरोपमा दुई जना पक्राउ परेका छन् ।
पक्राउ पर्नेमा स्याङ्जा आँधिखोला –१ हिलेकी ४१ वर्षीया चन्द्र कुमारी गुरूङ र ३८ वर्षीय धनराज गुरूङ रहेका छन् ।
यही साउन १२ गते बेलुकी चन्द्र कुमारी गुरूङले आफ्नै घरबाट ७.५ तोला सुनका गरगहना र नगद ४ हजार रुपैयाँ चोरी भएको भनी जिल्ला प्रहरी कार्यालयमा निवेदन दिएकी थिइन् ।
प्रहरीले अनुसन्धानको क्रममा उक्त सुन र नगद रकम चन्द्र कुमारी गुरूङ र धनराज गुरूङले आपसी मिलेमतोमा लुकाई छिपाई राखेको खुल्न आएको जिल्ला प्रहरी कार्यालय स्याङ्जाले जनाएको छ ।
अनुसन्धानबाट झुटो निवेदन दिएको पुष्टि भएपछि साउन १७ गते दुबै जनालाई नियन्त्रणमा लिई आवश्यक कानुनी कारवाही अघि बढाइएको प्रहरी नायव उपरीक्षक तथा सूचना अधिकारी प्रसन्न राज चौधरीले जानकारी दिए ।
प्रहरीका अनुसार झुटो विवरण दिएर प्रहरी प्रशासनलाई भ्रमित गर्ने कार्य अपराध हो र यस्ता कार्यमा संलग्नहरूलाई कानूनअनुसार कडा कारबाही गरिनेछ ।
