पोखरा कलेज अफ म्यानेजमेन्टमा पीसीएम फेष्ट २०२५ अन्तर्गत आइडिया पिच प्रतियोगिता सम्पन्न भएको छ । पोखरा उद्योग वाणिज्य संघको सभाकक्षमा सम्पन्न प्रतियोगितामा छ वटा समूहले आफ्नो व्यावसायिक योजना प्रस्तुत गरेका थिए ।
प्रतियोगितामा पहिलो स्थान प्राप्त गर्ने जर्सी हब समूहलाई नगद दश हजार रुपैयाँ र प्रमाणपत्र प्रदान गरिएको थियो । त्यसैगरी, दोस्रो स्थान प्राप्त गरेको ब्याग हेभेन समूहले छ हजार रुपैयाँ नगदसहित प्रमाणपत्र प्राप्त गर्यो ।
प्रतियोगीहरूको योजनाको मूल्यांकन व्यवसाय प्रवद्र्धन केन्द्र, पोखरा महानगरपालिकाका प्रमुख कार्यकारी अधिकृत नवराज अधिकारी, नेपाली युवा उद्यमी मञ्चका पूर्व अध्यक्ष प्रकाशदेव पालिखे तथा मिड टाउन ग्यालेरियाका निर्देशक निकेश द्वालले गरेका थिए ।
स्वागत मन्तव्य राख्दै कलेजको वार्षिक कार्यक्रम अनुसार नै यो प्रतियोगिता हरेक वर्ष आयोजना हुँदै आएको कार्यक्रम संयोजक हरि अधिकारीले जानकारी दिए ।
यस्तै, समापन मन्तव्य व्यक्त गर्दै प्रतियोगिताले उद्यमशीलता विषय अध्ययन गरिसकेका विद्यार्थीहरू माझ उद्यमी सोच निर्माण गर्न सघाएको कार्यक्रम संयोजक सरोज कुँवरले बताए ।
कार्यक्रममा फ्याकल्टी निकेश कर्माचार्यले मूल्यांकनका आधारहरू प्रस्तुत गरेका थिए भने फ्याकल्टी दीपेन्द्र पहारीले कार्यक्रम सञ्चालन गरेका थिए ।
पोखरा कलेज अफ म्यानेजमेन्टले विगत पच्चीस वर्षदेखि पोखरा विश्वविद्यालयको सम्बन्धनमा व्यवस्थापन अध्ययन स्नातक (बीबीए), वित्तमा स्नातक (बीबीए–फाइनान्स) र सूचना प्रविधिमा स्नातक (बीएस्सीआईटी) कार्यक्रमहरू सञ्चालन गर्दै आइरहेको छ ।
