श्रीकृष्ण जन्माष्टमी पोखरामा यसरी मनाइयो [फोटो फिचर]

प्रत्येक वर्ष भाद्र कृष्ण अष्टमीका दिनमा मनाइने श्रीकृष्ण जन्माष्टमी पर्व आज भगवान् श्रीकृष्णको पूजा आराधना गरी मनाइएको छ ।

पोखरामा पनि आज कृष्ण भगवानको पूजा आराधाना गरी यो पर्व मनाइएको छ । पोखरा वडा नं. १५ मा वृहत कार्यक्रम गरिएको छ । श्री कृष्ण जन्माष्टमीको पावन अवसरमा पोखरा महानगरपालिका १५ नं. वडा कार्यालय र सिद्धेश्वर भजन मण्डल तथा संरक्षण समितिले संयुक्त रुपमा महाउत्सव एवं कृष्णझुला कार्यक्रम राखेको थियो ।

बिहान सिद्धेश्वर शिव मन्दिरबाट भजनकीर्तनसहितको र्‍याली कृष्ण मन्दिर बन क्याम्पस, हरियोखर्क अस्पताल, कृष्णमन्दिर घलेचोक, रामबजार, वडा कार्यालय हुँदै पुनः सिद्धेश्वर शिव मन्दिर पुगेर समापन गरियो । गण्डकी प्रदेश सांसद भीम कार्कीको प्रमुख आतिथ्यतामा कार्यक्रम गरियो भने साँझ कास्की क्षेत्र नं. २ का सांसद विद्या भट्टराईको प्रमुख आतिथ्यतामा कृष्ण झुला प्रस्तुत गरिएको वडा नं. १५ का अध्यक्ष तोरण बानियाँले जानकारी दिए ।

ज्ञानयोग, कर्मयोग र भक्तियोगका प्रणेता भगवान् श्रीकृष्णको जन्म द्वापरयुगको अन्त्यतिर भाद्रकृष्ण अष्टमीको मध्यरातमा भएको सम्झनामा आजको दिनमा श्रीकृष्ण जन्माष्टमी पर्व मनाउने गरिएको हो ।

दुर्जनको विनाश गरी सज्जनको रक्षाका लागि भगवान् विष्णुको आठौँ गर्भका रुपमा श्रीकृष्णको जन्म भएको शास्त्रमा वर्णन गरिएको छ ।कंसको अत्याचारबाट मानव जातिलाई मुक्ति दिन वासुदेव र देवकीको आठौँ गर्भबाट भगवान् विष्णुको आठौँ अवतारका रुपमा आजैका दिन भगवान् श्रीकृष्णको जन्म भएको धार्मिक विश्वास छ ।

अन्याय, अत्याचार र दानवी प्रवृत्तिबाट मानव जातिलाई सुरक्षित बनाउने उद्देश्यले भगवान् विष्णुले मानिसको अवतारका रुपमा श्रीकृष्ण भई धर्तीमा जन्म लिएको स्मृतिस्वरुप आजको दिन यो पर्व मनाउने गरिएको हो ।

कौरव र पाण्डवका बीचमा कुरुक्षेत्रमा भएको धर्मयुद्धमा सत्यको पक्षमा रहेका पाँच पाण्डवमध्येका अर्जुनको सारथीका रुपमा श्रीकृष्णले युद्धको शिक्षा दिएका थिए । युद्धका क्रममा श्रीकृष्णले अर्जुनलाई दिएको उपदेश नै श्रीमद्भगवत गीता हो ।

श्रीकृष्णले गोपिनी र राधासँग गरेको प्रेम प्रसङ्गका कारण यो महिनाभर प्रेम उत्सव अर्थात् झुला उत्सवका रुपमा समेत मनाउने गरिन्छ । आजको दिन पाटनको मङ्गलबजारस्थित प्रसिद्ध श्रीकृष्ण मन्दिर, काठमाडौँको पूर्वी भेगस्थित गोठाटारमा रहेको नवतनधाम, उत्तरी भेग बूढानीलकण्ठस्थित श्रीकृष्ण भावनामृत सङ्घको मन्दिरमा र देशभरका अन्य कृष्ण मन्दिरमा भव्यरुपमा पूजा, आराधना एवम् रथयात्रा र शोभायात्रा गरी श्रीकृष्ण जन्माष्टमी पर्व मनाउने गरिन्छ ।

आजको दिनमा विशेष गरी महिलाहरु ब्रत बसी राति १२ बजे श्रीकृष्ण जन्मिएको सम्झनामा पूजा लगाउने र रातभर जाग्राम बसेर श्रीकृष्णको भक्ति सङ्गीत गाउने गर्दछन् । यसो गरेमा श्रीकृष्ण प्रशन्न भई मनोवाञ्छित फल प्राप्त हुने धार्मिक विश्वास रहेको छ । श्रीकृष्ण जन्माष्टमको अवसरमा सरकारले आज सार्वजनिक बिदा दिएको छ ।

यसैगरी, पाेखरा १५ स्थित श्री कृष्ण मन्दिर सञ्चालक समितिले पनि शाेभायात्रा निकालेकाे छ । पाेखरा १५ मा निकालिएका यी २ शाेभा यात्रामा हजाराैं पाेखरेलीले सहभागिता जनाए । महिला समूह, टोलविकास संस्था, आमा समूह, विद्यालय, जातिय तथा धार्मिक संघसंस्थाको उल्लेख्य सहभागिता रहेको थियो । भजन समूह, पञ्चेबाजा तथा ब्याण्ड बाजा समूह पनि सहभागी थिए ।