जिल्ला प्रशासन कार्यालय स्याङ्जाले जिल्लास्थित विभिन्न सरकारी कार्यालयमा छड्के अनुगमन गर्दा ३४ जना कर्मचारीको उपस्थिति तथा समयपालनमा कैफियत भेटिएको छ ।
प्रशासन कार्यालयका अनुसार मंगलबार बिहान ९ बजेदेखि चार वटा टोली परिचालन गरी जिल्लाका १३ वटा सरकारी कार्यालयमा अनुगमन गरिएको थियो । अनुगमनका क्रममा स्वीकृति नलिई बिदा वा काजमा बसेका, हाजिर गरेर कार्यालयमा उपस्थित नभएका तथा ढिला कार्यालय आउने कर्मचारीको विवरण संकलन गरिएको हो ।
अनुगमन गरिएका कार्यालयमा खानेपानी तथा सरसफाइ डिभिजन कार्यालय, भेटेरिनरी अस्पताल तथा पशु सेवा कार्यालय, जिल्ला समन्वय समिति, राष्ट्रिय कृषि आधुनिकीकरण परियोजना कार्यान्वयन इकाइ, पूर्वाधार विकास कार्यालय, ऊर्जा जलस्रोत तथा सिँचाइ डिभिजन कार्यालय, प्रदेश अस्पताल, प्रदेश जनस्वास्थ्य कार्यालय, भूमि प्रशासन कार्यालय, नापी कार्यालय, एकीकृत सेवा कार्यालय, शिक्षा विकास तथा समन्वय इकाइ र डिभिजन वन कार्यालय रहेका छन् ।
अनुगमनका क्रममा स्वीकृति नलिई बिदा वा काजमा बसेका ७ जना, हाजिर गरी कार्यालयमा उपस्थित नभएका १ जना र ढिला उपस्थित भएका १२ जना कर्मचारी भेटिएका छन् । त्यस्तै, समयपालन पूर्ण रूपमा पालना नगरेका १४ जनाको विवरण समेत अनुगमन प्रतिवेदनमा उल्लेख गरिएको छ ।
कार्यालयमा गरिएको अनुगमनका क्रममा कैफियत देखिएका कर्मचारीमाथि प्रचलित कानुनअनुसार कारबाही गर्न सम्बन्धित कार्यालयलाई पत्राचार गरिएको जिल्ला प्रशासन कार्यालय स्याङ्जाले जनाएको छ । साथै, कारबाहीको विवरण सात दिनभित्र जिल्ला प्रशासन कार्यालयलाई उपलब्ध गराउन सम्बन्धित कार्यालयहरूलाई निर्देशन दिइएको छ ।
जिल्ला प्रशासन कार्यालय स्याङ्जाका सूचना अधिकारी तथा सहायक प्रमुख जिल्ला अधिकारी प्रेम सुवेदीले सरकारी कार्यालयमा कर्मचारीको नियमित उपस्थिति र समयपालनलाई प्रशासनले प्राथमिकतामा राखेको बताए । सेवाग्राहीलाई प्रभावकारी सेवा उपलब्ध गराउन कर्मचारी कार्यालयमा नियमित उपस्थित हुनुपर्ने भन्दै उनले कैफियत देखिएका कार्यालयलाई आवश्यक सुधार र कानुनअनुसारको कारबाहीका लागि पत्राचार गरिएको जानकारी दिए ।
उनका अनुसार छड्के अनुगमनको उद्देश्य कर्मचारीलाई दुःख दिने नभई सरकारी सेवा प्रवाहलाई नियमित, प्रभावकारी र सेवाग्राहीमैत्री बनाउनु हो । सरकारी कार्यालयमा कर्मचारीको उपस्थिति तथा सेवा प्रवाहको अवस्थाबारे प्रशासनले आगामी दिनमा पनि अनुगमनलाई निरन्तरता दिने उनले बताए ।
प्रशासनको अनुगमनले कार्यालय समयमा कर्मचारीको उपस्थिति, बिदा तथा काज व्यवस्थापन र समयपालनलाई थप व्यवस्थित बनाउन सहयोग पुग्ने अपेक्षा गरिएको छ ।
