स्याङ्जाको ऐतिहासिक तथा पुरानो सदरमुकाम नुवाकोटमा वर्षौंदेखि रहेको खानेपानी समस्याको समाधानका लागि नेपाली सेनाले २० हजार लिटर क्षमताको आधुनिक खानेपानी ट्याङ्की निर्माण गरेको छ ।
सेनाको आर्थिक तथा प्राविधिक सहयोगमा बनेको यो योजनाबाट स्थानीय बासिन्दा, कालभैरव मन्दिरमा दर्शन गर्न आउने भक्तजन तथा पर्यटकले नियमित खानेपानी सुविधा पाउने भएका छन् ।
पुतलीबजार नगरपालिका–५ स्थित नुवाकोटमा सिंह शार्दूल गुल्म आँधीखोला ब्यारेकको शीघ्र प्रभावी आयोजना अन्तर्गत करिब ६ लाख ५० हजार रुपैयाँको लागतमा खानेपानी ट्याङ्की निर्माण गरिएको हो ।
सिंह शार्दूल गुल्मका गुल्मपति सेनानी राजेश उप्रेतीका अनुसार स्थानीयको आवश्यकता पहिचान गरी योजना अघि बढाइएको हो । निर्माण सम्पन्न भएपछि खानेपानीको आपूर्ति व्यवस्थित बनाउन ट्याङ्की सञ्चालनमा ल्याइएको उनले बताए ।
उनका अनुसार योजना निर्माणमा स्थानीय निर्माण व्यवसायी सफल श्रेष्ठ, ज्येष्ठ नागरिक तथा स्थानीय उपभोक्ता लेखबहादुर केसीलगायतले पनि सहयोग गरेका थिए ।
एक कार्यक्रमकाबीच उक्त योजना पुतलीबजार नगरपालिकाका नगरप्रमुख तुलसीराम रेग्मी र पुतलीबजार नगरपालिका–५ का वडा अध्यक्ष अर्जुनकुमार कार्कीलाई संयुक्तरूपमा हस्तान्तरण गर्दै पश्चिम पृतनाका पृतनापति उपरथी भोलानाथ थापाले नेपाली सेना सीमाको सुरक्षामा मात्र नभई समुदायका आवश्यकतासँग जोडिएका जनहितका काममा पनि सक्रिय रहँदै आएको बताए ।
‘स्थानीयलाई प्रत्यक्ष लाभ पुग्ने योजनालाई प्राथमिकतामा राखेर काम गरिरहेका छौं । नुवाकोटमा निर्माण गरिएको यो खानेपानी योजनाले स्थानीय बासिन्दा, धार्मिक पर्यटक र यहाँ आउने सबैलाई सहजता दिने विश्वास लिएका छौं,’ उनले भने ।
नुवाकोट धार्मिक, ऐतिहासिक तथा पर्यटकीय दृष्टिले महत्वपूर्ण क्षेत्र भएकाले खानेपानी पूर्वाधार निर्माणले त्यस क्षेत्रको विकासमा समेत सहयोग पुग्ने अपेक्षा गरिएको छ ।
पुतलीबजार नगरपालिकाका नगरप्रमुख तुलसीराम रेग्मीले खानेपानी योजना निर्माणमा सहयोग गरेको भन्दै नेपाली सेनाप्रति आभार व्यक्त गरे । उनले नुवाकोटको ऐतिहासिक र पर्यटकीय महत्वलाई ध्यानमा राख्दै यहाँ नेपाली सेनाको एउटा गण स्थापना गर्नसमेत आग्रह गरे ।
निर्माण सम्पन्न भएपछि सेनाले उक्त योजना पुतलीबजार नगरपालिका र पुतलीबजार नगरपालिका–५ मार्फत स्थानीय उपभोक्तालाई सञ्चालनका लागि जिम्मा दिएको छ । स्थानीयवासीले पनि खानेपानी ट्याङ्की निर्माणसँगै स्वच्छ र नियमित खानेपानीको पहुँच विस्तार भएको भन्दै खुसी व्यक्त गरेका छन् ।
