स्याङ्जा प्रहरीले आन्तरिक तथा बाह्य पर्यटक तथा सवारी चालकलाई सडक सुरक्षा र यात्रासम्बन्धी आवश्यक जानकारी सहज रूपमा उपलब्ध गराउने उद्देश्यले क्यूआर कोडमा आधारित सूचना सेवा सञ्चालनमा ल्याएको छ ।
गण्डकी प्रदेशको मुख्य प्रवेशद्वार मानिने गल्याङ नगरपालिका–१ राम्दीस्थित नेपाल प्रहरीको चेकपोस्टमा स्याङ्जा प्रहरीले बिहीबारदेखि उक्त सेवा सुरु गरेको हो । पर्यटकको सुरक्षा, सहज यात्रा र सूचना पहुँचलाई प्रभावकारी बनाउन क्यूआर प्रणाली लागू गरिएको जिल्ला प्रहरी कार्यालय स्याङ्जाका प्रमुख प्रहरी उपरीक्षक रन्जित सिंह राठौरले जानकारी दिए ।
उनका अनुसार क्यूआर कोड स्क्यान गरेपछि यात्रासँग सम्बन्धित आवश्यक जानकारी नेपाली र अंग्रेजी दुवै भाषामा अडियो तथा टेक्स्टका माध्यमबाट प्राप्त गर्न सकिने व्यवस्था गरिएको छ । सेवा विशेषगरी पर्यटक तथा सवारी चालकलाई लक्षित गरेर तयार गरिएको हो ।
क्यूआरमार्फत प्रमुख पर्यटकीय गन्तव्यको दूरी र अवस्थिति, सम्बन्धित सडकको अवस्था, बढी दुर्घटना हुने स्थानको विवरण, ट्राफिक नियम, राजमार्ग आसपास रहेका प्रहरी कार्यालयका सम्पर्क नम्बर, अस्पताल तथा स्वास्थ्य संस्थाको विवरण, पेट्रोल पम्प, विद्युतीय सवारीका लागि चार्जिङ स्टेशन, सार्वजनिक शौचालय, बजार क्षेत्र, होटल–रेष्टुरेन्ट तथा पर्यटकीय स्थलसम्बन्धी जानकारी उपलब्ध गराइएको प्रहरीले जनाएको छ ।
जिल्ला ट्राफिक प्रहरी कार्यालय स्याङ्जाका प्रमुख प्रहरी नायब निरीक्षक नरेन्द्रबहादुर शाहीले यात्रु तथा पर्यटकलाई सुरक्षित र सहज यात्रा अनुभव दिलाउने उद्देश्यले सेवा सुरु गरिएको बताए । यात्राका क्रममा आवश्यक सूचना सहजै उपलब्ध हुँदा सवारी दुर्घटना न्यूनीकरण, सडक अनुशासनको पालना तथा यात्रुको सुविधा अभिवृद्धिमा टेवा पुग्ने उनको विश्वास छ ।
सिद्धार्थ राजमार्गको लुम्बिनी–गण्डकी दुई प्रदेश जोड्ने बुटवल–पोखरा सडकखण्डअन्तर्गत गण्डकी प्रदेशको प्रवेशद्वारका रूपमा परिचित राम्दी क्षेत्रमा सुरु गरिएको यो प्रविधिमैत्री सेवाले आधुनिक सूचना प्रविधिको प्रयोगमार्फत सार्वजनिक सेवा प्रवाहलाई थप प्रभावकारी बनाउनुका साथै पर्यटन प्रवर्द्धनमा समेत सकारात्मक योगदान पुग्ने अपेक्षा गरिएको प्रहरीले जनाएको छ ।
