जिल्लामा सडक सुरक्षा र यात्रु सुरक्षालाई प्रभावकारी बनाउन जिल्ला ट्राफिक प्रहरी कार्यालय स्याङ्जाले निगरानीलाई थप कडा बनाएको छ । ट्राफिक प्रहरीले सार्वजनिक यातायातदेखि निजी सवारीसम्म नियमित अनुगमन बढाउँदै दुर्घटना न्यूनीकरणका लागि विभिन्न अभियान सञ्चालन गरिरहेको छ ।
यसैक्रममा ट्राफिक प्रहरीले सवारीसाधनमा जडान गरिएका अनावश्यक झल्लर, स्टिकर, अतिरिक्त फोकस लाइट तथा प्रेसर हर्न हटाउने अभियान सुरु गरेको छ । जिल्लाभित्र सञ्चालन हुने ठूला तथा साना सवारीसाधनमा नियमविपरीत जडान गरिएका सामग्री हटाउन थालिएको ट्राफिक कार्यालय स्याङ्जाले जनाएको छ ।
सवारीसाधनमा अनावश्यक झल्लर तथा सजावट राख्ने प्रवृत्ति नियन्त्रण गर्न जिल्ला ट्राफिक प्रहरी कार्यालय स्याङ्जाले अभियान नै थालेको छ । दुर्घटना न्यूनीकरण र सडक सुरक्षालाई प्राथमिकतामा राख्दै ट्राफिक प्रहरीले ट्रक, बस, ट्याक्टरलगायतका सवारीसाधनमा झुण्ड्याइएका झल्लर, माला, कपडा तथा अन्य सजावटी सामग्री हटाउन सुरु गरेको हो ।
जिल्लाका विभिन्न स्थानमा गरिएको सवारी जाँचका क्रममा चालकको दृश्य क्षमतामै असर पुग्ने गरी सजावट राखिएको पाइएको ट्राफिक प्रहरी कार्यालयले जनाएको छ । यस्ता सामग्रीले रियर भ्यू मिरर तथा सवारीको दायाँ–बायाँको दृश्य अवरुद्ध गर्नुका साथै यात्रुलाई असहज वातावरण सिर्जना गर्ने र दुर्घटनाको जोखिम समेत बढाउने भएकाले अभियानलाई तीव्रता दिइएको कार्यालयले जनाएको छ ।
जिल्ला ट्राफिक प्रहरी कार्यालय स्याङ्जाका प्रमुख प्रहरी नायब निरीक्षक नरेन्द्रबहादुर शाहीका अनुसार सवारीमा राखिएका झल्लर, स्टिकर र अतिरिक्त फोकस लाइटले चालकको ध्यान विचलित गराउनुका साथै दुर्घटनाको जोखिमसमेत बढाउने भएकाले अभियान सञ्चालन गरिएको हो ।
उनका अनुसार कम्पनीबाट जडान गरिएका उपकरणबाहेक थप बत्ती प्रयोग गर्दा विपरीत दिशाबाट आउने चालकलाई समस्या हुने र सडक दुर्घटनाको सम्भावना बढ्ने गरेको छ । यससँगै, ध्वनि प्रदूषण गर्ने प्रेसर हर्नसमेत हटाउने कामलाई प्राथमिकताका साथ अघि बढाइएको उनले बताए ।
ट्राफिक प्रहरीको सक्रियता केवल सवारीका सामग्री हटाउने अभियानमा मात्र सीमित छैन । यससँगै, सार्वजनिक यातायात सेवा सुरक्षित र व्यवस्थित बनाउन चालक तथा सवारीसाधनमाथिको निगरानी पनि निरन्तर चलिरहेको छ ।
कार्यालयका अनुसार सार्वजनिक सवारीका चालकले मादक पदार्थ वा लागूपदार्थ सेवन गरेर सवारी चलाएको छ कि छैन भन्ने विषयमा नियमित परीक्षण गरिँदै आएको छ । सिद्धार्थ राजमार्ग हुँदै सञ्चालन हुने सार्वजनिक सवारीका चालकहरूको स्वास्थ्य अवस्था समेत बेलाबेलामा जाँच गर्ने गरिएको छ । परीक्षणका क्रममा नियम उल्लंघन गरेको पाइएमा कानुनी प्रक्रिया अघि बढाइने गरिएको ट्राफिक प्रहरीले जनाएको छ ।
यात्रुसँग तोकिएकोभन्दा बढी भाडा असुल गरिएको छ कि छैन, सवारीमा भाडादर सूची टाँस गरिएको छ कि छैन लगायतका विषयमा पनि नियमित अनुगमन भइरहेको छ । लामो तथा छोटो दूरीका सार्वजनिक सवारीमा यात्रुको गुनासो आउन नदिन विशेष ध्यान दिइएको ट्राफिक कार्यालयको भनाइ छ ।
प्रहरी नायब निरीक्षक शाहीले यात्रुको सुरक्षालाई पहिलो प्राथमिकतामा राखेर निगरानी, परीक्षण र सचेतनामूलक कार्यक्रम सञ्चालन भइरहेको बताए । “सुरक्षित यात्रा सुनिश्चित गर्नु हाम्रो प्राथमिकता हो । दुर्घटना न्यूनीकरण र सार्वजनिक यातायातलाई थप व्यवस्थित बनाउन यस्ता गतिविधिलाई आगामी दिनमा अझ प्रभावकारी रुपमा निरन्तरता दिन्छौँ,” उनले भने ।
पछिल्ला दिनमा ट्राफिक प्रहरीले जिल्लाभर सार्वजनिक यातायात क्षेत्रमा सडक अनुशासन कायम गराउने, नियमको कार्यान्वयन सुनिश्चित गर्ने र चालकलाई जिम्मेवार बनाउने र यात्रुलाई सुरक्षित वातावरणमा यात्रा गर्ने अवसर सुनिश्चित गर्ने प्रयासलाई तीव्र बनाएको छ । यसले स्याङ्जामा ट्राफिक व्यवस्थापन र यात्रु सुरक्षाप्रति प्रहरीको सक्रियता थप देखिएको छ ।
