स्याङ्जाको वालिङ नगरपालिका–९ र १० का कृषकले सिँचाइको आशामा बनाइएको पानी सङ्कलन ट्याङ्की वर्षौंदेखि प्रयोगमा नआएपछि गुनासो गरेका छन् । खेतीयोग्य जमिनमा पानी पुर्याउने उद्देश्यले निर्माण गरिएको ट्याङ्की १४ वर्ष बितिसक्दा पनि पूर्ण रूपमा सञ्चालनमा आउन सकेको छैन ।
झण्डै पाँच हजार रोपनी जमिनमा सिँचाइ सुविधा पुर्याउने लक्ष्यसहित वि.सं. २०६९ सालमा आठ लाख लिटर क्षमताको ट्याङ्की निर्माण गरिएको थियो । वालिङ साना सहरी खानेपानी तथा सरसफाइ उपभोक्ता संस्थाले वालिङ–१० मदिखोलाको माथिल्लो भागबाट वालिङ बजारमा खानेपानी वितरण गरेबापत कृषकसँग भएको सहमतिअनुसार ट्याङ्की निर्माण गरेको जनाएको छ ।
तत्कालीन वालिङ साना सहरी खानेपानीका अध्यक्ष तथा पूर्वनगरप्रमुख भोजराज अर्यालका अनुसार बजार क्षेत्रमा पानी लैजाने विषयमा स्थानीय कृषकले अवरोध गरेपछि सिँचाइका लागि छुट्टै पानी सङ्कलन गर्ने सहमति बनेको थियो । सोही सहमतिअनुसार ट्याङ्की निर्माण गरिएको उनले बताए ।
खानेपानी विभागसँगको सहकार्यमा करिब ५६ लाख रुपैयाँ खर्च गरेर संरचना बनाइएको संस्थाका प्रमुख देव बोगटीले जानकारी दिए । तर निर्माण सम्पन्न भएको लामो समय बित्दा पनि कृषकले अपेक्षित लाभ लिन पाएका छैनन् ।
स्थानीय कृषक तथा सामाजिक अगुवा राजेन्द्रप्रसाद गैह्रेले कृषकको लामो संघर्षपछि निर्माण भएको ट्याङ्की बेवारिसे जस्तै बनेको बताए । “कृषकका लागि बनाइएको योजना वर्षौंदेखि अलपत्र छ,” उनले भने, “पटक–पटक आग्रह गर्दा पनि मर्मत र पुनः सञ्चालनमा कसैले ध्यान दिएको छैन ।”
२०८१ सालमा सामान्य रूपमा सञ्चालनमा ल्याउने प्रयास गरिए पनि असार महिनाको बाढीले पानी ल्याउने पाइपसहित आसपासका संरचनामा क्षति पुर्याएको कृषक सूर्यप्रसाद पौडेलले बताए । उनका अनुसार त्यसयता पुनर्निर्माणको काम अघि बढ्न सकेको छैन ।
संस्थाका प्रमुख बोगटीले बाढीबाट करिब १५ लाख रुपैयाँ बराबरको क्षति पुगेको जानकारी दिँदै मर्मत तथा पुनर्निर्माणको पहल भइरहेको बताए । कृषकलाई सहज सिँचाइ सुविधा उपलब्ध गराउने गरी ट्याङ्की पुनः सञ्चालनमा ल्याउने तयारी भइरहेको उनको भनाइ छ ।
