स्याङ्जाको आँधीखोला गाउँपालिका–५ जुग्लेमा एक किशोरी मृत अवस्थामा फेला परेपछि प्रहरीले घटनामा संलग्न भएको आशंकामा एक युवकलाई पक्राउ गरी अनुसन्धान अघि बढाएको छ । जुग्लेमा डेरा गरेर बस्दै आएका एक ट्याक्टर चालकको कोठाभित्र किशोरी झुण्डिएको अवस्थामा भेटिएपछि स्थानीय समुदाय नै स्तब्ध बनेको छ ।
जिल्ला प्रहरी कार्यालय स्याङ्जाका अनुसार शुक्रबार दिउँसो १६ वर्षीया किशोरी ट्याक्टर चालकको डेरा कोठाभित्र पर्दाको पासो लगाएर झुण्डिएको अवस्थामा फेला परेकी हुन् । सूचना प्राप्त हुनासाथ प्रहरी टोली घटनास्थल पुगेको थियो ।
प्रहरीले घटनास्थलको मुचुल्का तथा प्रारम्भिक अनुसन्धान पूरा गरी शवलाई पोस्टमार्टमका लागि प्रदेश अस्पताल पुतलीबजार स्याङ्जामा पठाएको जनाएको छ । घटनासँग सम्बन्धित आशंकामा कास्की पोखरा महानगरपालिका–२२ घर भएका २३ वर्षीय संगम नेपालीलाई नियन्त्रणमा लिइएको छ । उनी जुग्ले क्षेत्रमा ट्याक्टर चालकको रूपमा काम गर्दै आएका थिए ।
प्रहरीका अनुसार संगम नेपाली सोही क्षेत्रमा डेरा लिएर बस्दै आएका थिए । एउटै क्षेत्रमा बसोबास गर्ने भएकोले मृतक किशोरीसँग उनको चिनजान रहेको स्थानीयले बताएका छन् । घटनाको वास्तविक कारण भने अझै खुल्न नसकेको भन्दै प्रहरीले विभिन्न कोणबाट अनुसन्धान अघि बढाएको जनाएको छ ।
घटनापछि स्थानीय बासिन्दा ठूलो संख्यामा घटनास्थल आसपास जम्मा भएका थिए । किशोरीको असामयिक मृत्युले गाउँमा शोकको वातावरण बनेको स्थानीयको भनाइ छ । आफन्तजनले घटनाको निष्पक्ष अनुसन्धान गरी सत्यतथ्य सार्वजनिक गर्न माग गरेका छन् ।
जिल्ला प्रहरी कार्यालय स्याङ्जाका निमित्त सूचना अधिकारी प्रहरी निरीक्षक अमृत त्रिपाठीले घटनाबारे थप अनुसन्धान भइरहेको जानकारी दिए । उनका अनुसार घटनास्थलबाट आवश्यक प्रमाण संकलन गरिएको छ भने पक्राउ परेका युवकसँग सोधपुछ भइरहेको छ ।
“किशोरी झुण्डिएको अवस्थामा फेला परेको सूचना प्राप्त हुनासाथ प्रहरी टोली घटनास्थल पुगेको थियो,” प्रहरी निरीक्षक त्रिपाठीले भने, “घटनासँग सम्बन्धित व्यक्तिलाई नियन्त्रणमा लिएर अनुसन्धान अघि बढाइएको छ । पोस्टमार्टम रिपोर्ट र प्राविधिक अनुसन्धानपछि घटनाको वास्तविकता खुल्ने अपेक्षा गरेका छौँ ।”
उनले सामाजिक सञ्जालमा अपुष्ट विवरण सार्वजनिक नगर्न पनि आग्रह गरेका छन् । “अनुसन्धानकै क्रममा रहेका विषयमा हल्ला फैलाउँदा अनुसन्धान प्रभावित हुन सक्छ,” उनले भने ।
घटनालाई संवेदनशील रूपमा लिएर अनुसन्धान भइरहेको जिल्ला प्रहरी कार्यालय स्याङ्जाका प्रमुख प्रहरी उपरीक्षक दधिराम न्यौपानेले बताए । उनका अनुसार घटनापछिका सबै पक्षलाई आधार बनाएर अनुसन्धान अघि बढाइएको छ ।
“घटनासँग सम्बन्धित व्यक्तिहरूको गतिविधि, मोबाइल कल डिटेल र घटनाअघि भएका कुराकानीलगायतका विषयमा समेत अध्ययन भइरहेको छ,” प्रहरी उपरीक्षक न्यौपानेले भने, “हामीले तथ्य र प्रमाणका आधारमा अनुसन्धान गरिरहेका छौँ । पोस्टमार्टम रिपोर्टपछि थप विषय स्पष्ट हुने अपेक्षा गरेका छौँ ।”
पक्राउ परेका नेपालीमाथि आत्महत्या गर्न दुरुत्साहन गरेको आरोपमा स्याङ्जा जिल्ला अदालतबाट म्याद थप अनुमति लिएर अनुसन्धान अघि बढाइएको जिल्ला प्रहरी कार्यालय स्याङ्जाले जनाएको छ ।
आँधीखोला गाउँपालिकाका अध्यक्ष विश्वनाथ पौडेलले घटनाको निष्पक्ष छानबिन गरी दोषीमाथि कानुनी कारबाही हुनुपर्ने बताए । पछिल्लो समय युवायुवतीसँग सम्बन्धित घटनाहरू बढ्न थालेकाले समुदाय र अभिभावक स्तरमा सचेतना आवश्यक रहेको स्थानीयको भनाइ छ ।
प्रहरीले पोस्टमार्टम रिपोर्ट आएपछि घटनाबारे थप तथ्य सार्वजनिक हुने जनाएको छ । हाल पक्राउ परेका युवकलाई जिल्ला प्रहरी कार्यालयको हिरासतमा राखेर अनुसन्धान भइरहेको छ ।
