विद्यार्थी संख्या न्यून बन्दै गएपछि स्याङ्जाको भीरकोट नगरपालिकाले सामुदायिक विद्यालयको संरचना पुनःव्यवस्थित गर्ने निर्णय गरेको छ ।
नगरपालिकाले विभिन्न वडामा रहेका आधारभूत तहका विद्यालयलाई समायोजन गर्दै केही स्थानमा बाल विकास केन्द्र मात्रै कायम गर्ने तयारी अघि बढाएको हो ।
यहाँको वडा नं. ३, ७ र ८ का गरी नौ वटा आधारभूत विद्यालय समायोजनमा परेको नगर प्रवक्ता एवं वडा नं. १ का वडा अध्यक्ष दिपेन्द्र केसीले जानकारी दिए । उनका अनुसार यी विद्यालयहरू अब स्वतन्त्र रूपमा सञ्चालन नहुने र बाल विकास केन्द्रका रूपमा मात्र सीमित हुनेछन् ।
समायोजनमा पर्ने विद्यालयहरूमा वडा नं. ३ का जनविकास (रोजिखोला) र बटुकभैरव (बजारानी), वडा नं. ७ का बाघ भैरवी (चिउरीखर्क) र कालिका (खिलुङ) रहेका छन् । त्यस्तै, वडा नं. ८ का अमर (पखेरे), प्रगतिशील (शालिकोश), रत्न देवीस्थान (खोरबार), सरस्वती (चिलाउनेखार्क) र देउराली भन्ज्याङ (सिरूखर्क) पनि समेटिएका छन् ।
यसबाहेक, वडा नं. १ को रानीरह आधारभूत विद्यालयलाई लक्ष्मी आधारभूत विद्यालय (गजौंदी) मा गाभिएको छ भने वडा नं. ९ को भविष्य निर्माण आधारभूत विद्यालयमा कक्षा घटाएर १ देखि ३ सम्म मात्रै सञ्चालन गर्ने निर्णय गरिएको छ ।
न्यूनतम विद्यार्थी संख्या नपुगेका विद्यालयहरूलाई कार्यविधि–२०८२ अनुसार समायोजन गरिएको शिक्षा शाखा प्रमुख खड्गबहादुर रानाले बताए । उक्त कार्यविधिअनुसार कक्षा १–३ मा कम्तीमा ७ जना र कक्षा १–५ मा १० जना विद्यार्थी अनिवार्य हुनुपर्ने प्रावधान छ ।
विद्यालय समायोजनअघि स्थलगत अनुगमन, सरोकारवालासँग छलफल र कार्यदलको सिफारिसका आधारमा निर्णय गरिएको नगरपालिकाले जनाएको छ । कार्यदलका संयोजक तथा वडा नं. ४ का अध्यक्ष रत्नप्रकाश श्रेष्ठले १२ विद्यालय समायोजनका लागि सिफारिस गरे पनि सबै लागू नभएको बताए । वडा नं. ५ को तिलाहार नेटा आधारभूत विद्यालय भने समायोजनबाट जोगिएको छ ।
नगर कार्यपालिकाको बैठकले समायोजनसम्बन्धी निर्णय पारित गरिसकेको छ । सो निर्णय शैक्षिक सत्र २०८३ देखि कार्यान्वयनमा आउनेछ ।
समायोजनपछि शिक्षक तथा कर्मचारीलाई आवश्यकता अनुसार अन्य विद्यालयमा खटाइने शिक्षा शाखाले जनाएको छ ।
