पोखरा । बाल स्वास्थ्यसम्बन्धी महत्त्वपूर्ण शैक्षिक सम्मेलन गण्डकी नेपकन–२०२६ पोखरामा सम्पन्न भएको छ । सम्मेलनको उद्घाटन गण्डकी प्रदेशका मुख्यमन्त्री सुरेन्द्रराज पाण्डेले गरे ।
उद्घाटन समारोहलाई सम्बोधन गर्दै मुख्यमन्त्री पाण्डेले बाल स्वास्थ्य क्षेत्रमा गण्डकी प्रदेश सरकारले कुल बजेटको करिब १० प्रतिशत विनियोजन गर्दै बाल स्वास्थ्य सुधार तथा अन्तर्राष्ट्रिय लक्ष्यहरू हासिल गर्न प्रदेश सरकार प्रतिबद्ध रहेको बताए । उनले बालबालिकाको स्वास्थ्य सुधारका लागि प्रदेश सरकारले निरन्तर सहयोग गर्ने प्रतिबद्धता पनि जनाए ।
कार्यक्रममा नेपाल पेडियाट्रिक सोसाइटीका अध्यक्ष डा. अरूण कुँवरले संघीय संरचनामा गुणस्तरीय बाल स्वास्थ्य सेवा प्रवाहका लागि रेफरल सिष्टमलाई सुदृढ बनाउने तथा स्ट्याण्डर्डाइज्ड केयर लागू गर्नुपर्ने आवश्यकता औँल्याए ।
डा. कुँवरले देशभर समान स्तरको बाल स्वास्थ्य सेवा सुनिश्चित गर्न यस्ता शैक्षिक सम्मेलनहरू महत्त्वपूर्ण हुने उल्लेख गरे ।
कार्यक्रम आयोजक संस्थाका सचिव प्रा. डा. रामचन्द्र बास्तोलाले केन्द्र सरकारले विभिन्न प्रदेशहरूमा दक्ष जनशक्ति विकासमा थप सहयोग गर्नुपर्ने आवश्यकता औँल्याए ।
साथै प्रदेशस्तरमै अनुसन्धान तथा उपचार सेवामा उल्लेखनीय प्रगति भइरहेको जानकारी गराउँदै प्रा.डा. बास्तोलाले यस सम्मेलनलाई सफल बनाउन सहयोग गर्ने सम्पूर्ण व्यक्ति तथा संस्थाप्रति धन्यवाद व्यक्त गरे ।
सम्मेलनमा देशका विभिन्न स्थानबाट आएका बालरोग विशेषज्ञ, रेसिडेन्ट चिकित्सक तथा स्वास्थ्यकर्मीहरूको एल्लेख्य सहभागिता रहेको थियो।
यस सम्मेलनले बाल स्वास्थ्य सेवा सुदृढीकरण, अनुसन्धान प्रवर्द्धन तथा अनुभव आदान–प्रदानमा महत्वपूर्ण योगदान पुर्याउने विश्वास व्यक्त गरिएको छ।
