यही फागुन २१ गते हुने प्रतिनिधिसभा सदस्य निर्वाचनका लागि स्याङ्जामा चुनाव सामग्री र मतपत्र वितरण गरिएको छ । मतदान अधिकृतलाई अभिमुखीकरण गरी नियुक्तिपत्र प्रदान गरेसँगै चुनाव सामग्री बुझाउने काम अघि बढाइएको हो ।
जिल्ला निर्वाचन कार्यालय स्याङ्जाका प्रमुख श्रीराम थापाका अनुसार मतदान केन्द्रमा खटिएका कर्मचारीलाई आवश्यक सामग्री हस्तान्तरणसँगै अन्तिम तयारीलाई तीव्र बनाइएको हो । उनले ५१ प्रकारका निर्वाचन सामग्री मतदान अधिकृतलाई हस्तान्तरण गर्न थालिएको जानकारी दिए ।
“मतदान केन्द्रमा आवश्यक सम्पूर्ण सामग्री तयारी अवस्थामा छ । टाढाका केन्द्रमा खटिने कर्मचारीलाई प्राथमिकतामा राखेर वितरण सुरु गरेका छौं,” थापाले भने ।
जिल्लाका दुई निर्वाचन क्षेत्रअन्तर्गत क्षेत्र नम्बर १ का मतदानस्थलमा खटिएका कर्मचारीलाई निर्वाचन कार्यालयबाट निर्वाचन सामाग्री तथा मतपत्र मुख्य निर्वाचन अधिकृतको कार्यालयबाट उपलब्ध गराइएको छ ।
यस्तै, क्षेत्र नम्बर २ का कर्मचारीलाई सम्बन्धित क्षेत्रीय निर्वाचन अधिकृतको कार्यालयबाट आजै निर्वाचन सामाग्री तथा मतपत्र बुझाउने तयारी गरिएको कार्यालयले जनाएको छ ।
मतदानस्थलमा पुगेपछि कर्मचारीले सूचना टाँस गर्ने, वरपर राखिएका प्रचार सामग्री हटाउने, आचारसंहिता पालना भए/नभएको अनुगमन गर्ने लगायतका काम सुरु गर्नेछन् ।
निर्वाचनका लागि मतदाता नामावली, स्वस्तिक छाप, लाहा, मतपेटिका सिल, स्टिकर, स्ट्याम्प प्याड, मसी, मतपेटिका, मतपत्र, रबर म्याट, कपडा, कैँची, निर्देशिका, स्केल, कागज, सियो–धागो, सलाइ, ब्रोसरलगायत सामग्री वितरण गरिएको छ । जिल्लाभर तीन सयभन्दा बढी मतदान अधिकृत, सहायक मतदान अधिकृतसहित करिब एक हजार पाँच सयभन्दा बढी कर्मचारी परिचालन गरिएको छ ।
स्याङ्जामा प्रतिनिधिसभातर्फ दुई निर्वाचन क्षेत्र कायम छन् । स्याङ्जामा १ लाख २२ हजार ४६४ पुरुष, १ लाख २६ हजार ३५१ महिला र एक जना अन्य लिङ्गका मतदाता रहेका छन् । करिब २ लाखभन्दा बढी मतदाता रहेको जिल्लामा पुरुषको तुलनामा महिला मतदाता केही बढी छन् ।
जिल्लाभर १९९ मतदानस्थलअन्तर्गत ३२२ मतदान केन्द्र कायम गरिएका छन् भने जिल्ला कारागार स्याङ्जालाई अस्थायी मतदान केन्द्र तोकिएको छ । सुरक्षा संवेदनशीलताको आधारमा ५६ केन्द्रलाई अतिसंवेदनशील, ७१ संवेदनशील र बाँकी ७२ केन्द्रलाई सामान्य रूपमा वर्गीकरण गरिएको छ ।
निर्वाचनमा विभिन्न राजनीतिक दलका उम्मेदवारसहित तीन स्वतन्त्र उम्मेदवार गरी २४ जना प्रतिस्पर्धामा छन् । दलहरूले चुनावी प्रचारलाई अन्तिम चरणमा पुर्याएका छन् भने जिल्लामा चुनावी माहोल तातेको छ ।
