प्रतिनिधिसभा सदस्य निर्वाचन नजिकिँदै जाँदा स्याङ्जा निर्वाचन क्षेत्र नम्बर १ मा चुनावी माहोल तातेको छ । फागुन २१ गते हुने निर्वाचनलाई लक्षित गर्दै विभिन्न दलका उम्मेदवारहरू प्रचारप्रसारमा सक्रिय भइरहेका बेला नेपाली काँग्रेसका उम्मेदवार भरतराज ढकालले भने आफ्नो दशबुँदे प्रतिबद्धता सार्वजनिक गर्दै मतदातामाझ पुगेका छन् ।
यस क्षेत्रमा १२ जना उम्मेदवार चुनावी दौडमा रहँदा ढकालले विकासका प्राथमिकता स्पष्ट पार्दै अल्पकालीन, मध्यकालीन र दीर्घकालीन योजनासहित कार्यक्रम अघि सारेका हुन् । उनले स्वामित्व, उत्पादन, शिक्षा, स्वास्थ्य, पूर्वाधार, उद्यम तथा पर्यटन, सामाजिक कल्याण, जोखिम व्यवस्थापन र सुशासनलाई मुख्य एजेन्डाका रूपमा अघि बढाएका छन् ।
मुक्तिनाथ विकास बैंक र मुक्तिनाथ कृषि कम्पनीका पूर्व अध्यक्षसमेत रहेका ढकालले नागरिककै स्वामित्वमा पब्लिक कम्पनी स्थापना गरी कृषि र अन्य गौरवका आयोजना सञ्चालन गर्ने अवधारणा अघि सारेका छन् । “एक वडा–एक उत्पादन” कार्यक्रममार्फत स्थानीय स्तरमै उत्पादन वृद्धि, उद्यमशीलता विकास र रोजगारी सिर्जना गर्ने योजना उनको सङ्कल्पपत्रमा समेटिएको छ ।
शिक्षातर्फ अनिवार्य, व्यवहारिक, प्रविधिमैत्री र बजारसँग जोडिएको गुणस्तरीय शिक्षा सुनिश्चित गर्ने प्रतिबद्धता जनाइएको छ । स्वास्थ्य क्षेत्रमा स्वास्थ्य बीमाको दायरा विस्तार गर्दै सबैका लागि सुलभ र गुणस्तरीय सेवा उपलब्ध गराउने लक्ष्य राखिएको प्रचार विभागका सचिवालय प्रमुख ध्रुव खाँणले जानकारी दिए ।
यसैगरी, स्वच्छ खानेपानी, नवीकरणीय ऊर्जा, सडक सञ्जाल, इन्टरनेट विस्तार र खेलकुद पूर्वाधार विकासलाई प्राथमिकतामा राखिएको छ । युवालाई प्रविधि, प्रतिस्पर्धात्मक क्षमता र संस्थागत सहयोगमार्फत उद्यमतर्फ उन्मुख गराउने योजना पनि ढकालले अघि सारेका छन् ।
कला तथा पर्यटन प्रबर्द्धनका लागि स्थानीय संस्कृति, सम्पदा, जैविक विविधता र प्राङ्गारिक उत्पादन संरक्षण तथा प्रचारमा जोड दिने प्रतिबद्धता गरिएको छ । साथै, महिला, ज्येष्ठ नागरिक, पिछडिएका वर्ग र विपन्न समुदाय लक्षित कार्यक्रम सञ्चालन तथा राहत कोष स्थापना गर्ने योजना समेटिएको छ ।
वन्यजन्तु, विशेषगरी बाँदर लगायतका जंगली जनावरबाट हुने क्षति न्यूनीकरण तथा प्राकृतिक विपद् व्यवस्थापनका लागि जोखिम कोष स्थापना गर्ने विषय पनि सङ्कल्पपत्रमा उल्लेख छ । तीनै तहका सरकार र गैरसरकारी निकायबीच समन्वय गर्दै आधारभूत सेवा प्रभावकारी बनाउने र आर्थिक सार्वजनिक सुनुवाइमार्फत सुशासन सुनिश्चित गर्ने प्रतिबद्धता ढकालले व्यक्त गरेका छन् ।
चुनावी सरगर्मी बढिरहेका बेला ढकालको यो घोषणापत्रले मतदातामाझ कस्तो प्रभाव पार्ने हो, त्यो भने फागुन २१ को मतपरिणामले देखाउनेछ ।
