रोजगारीको सिलसिलामा रोमानिया पुगेका स्याङ्जा पुतलीबजार नगरपालिका–५ पौवैगौंडेका रमेश थापाको असामयिक निधनपछि संकलित आर्थिक सहयोग परिवारलाई हस्तान्तरण गरिएको छ । स्याङ्जा सहयोग समाज अन्तर्राष्ट्रिय समन्वय समितिले संकलित सहयोग रकम बुधबार हस्तान्तरण गरेको हो ।
पौवैगौंडेस्थित थापाको निवासमै पुगेर समितिको टोलीले युरोप क्षेत्रबाट संकलित ३ लाख ४ हजार ३८४ रुपैयाँ र संस्थागत तर्फबाट १५ हजार २६६ रुपैयाँ गरी कुल ३ लाख १९ हजार ६५० रुपैयाँ सहयोग रकम हस्तान्तरण गरेको हो ।
संकलित रकम थापाकी श्रीमती सोनी केसी थापाको नेपाल इन्भेस्टमेन्ट मेघा बैंक लिमिटेडमा डिपोजिट गरी बैंक भौचर थापाकी श्रीमती र परिवारलाई निवासमै पुगेर हस्तान्तरण गरिएको स्याङ्जा सहयोग समाज अन्तर्राष्ट्रिय समन्वय समितिका पूर्व अध्यक्ष एवं संरक्षक टुकराज अर्यालले जानकारी दिए । विशेषगरी नाबालक छोराको भविष्यलाई ध्यानमा राख्दै संकलित सहयोगले केही राहत पुग्ने अर्यालले विश्वास व्यक्त गरेका थिए ।
रकम हस्तान्तरण कार्यक्रममा संस्थाका संस्थापक अध्यक्ष अनन्त कुमार श्रेष्ठले समाजले वास्तविक पीडित परिवारसम्म सहयोग पुर्याएको बताए । “स्याङ्जा सहयोग समाज निरन्तर सामाजिक क्षेत्रमा सक्रिय रहँदै आएको छ । आगामी दिनमा पनि यस्तै कार्यलाई निरन्तरता दिनेछौं,” उनले भने ।
कार्यक्रममा नेपाल पत्रकार महासंघ स्याङ्जाका सदस्य राम बहादुर रोकाहा, स्याङ्जा सहयोग समाज अन्तर्राष्ट्रिय समन्वय समितिका सल्लाहकार मेघ प्रनेश, हरिप्रसाद अर्याल, कोषाध्यक्ष चिरञ्जीवी ढकाल, युवा संयोजक विदुर कोइराला, सामी कार्यक्रमका जिल्ला संयोजक अनन्त रेग्मी लगायतको उपस्थिति रहेको थियो ।
झण्डै १३ महिनाअघि रोजगारीका लागि रोमानिया पुगेका थापाको सन् २०२५ डिसेम्बर २४ को बिहान हृदयघातका कारण निधन भएको थियो । थापाका श्रीमती र एक छोरा छन् ।
कम्पनीको काम सकेर साँझ खाना खाई निवासमै सुतिरहेका अवस्थामा उनको मृत्यु भएको खबर आएपछि परिवार मात्र होइन, गाउँ नै शोकमा डुबेको थियो । युवा अवस्थामै भएको अप्रत्याशित निधनले सबैलाई स्तब्ध बनाएको थियो ।
दुःखद घटनापछि मृतकको शव नेपाल ल्याउन विभिन्न निकायले पहल गरेका थिए । संस्थाका अध्यक्ष मीन क्षेत्रीको अग्रसरतामा नेपाल सरकार, श्रम तथा रोजगार मन्त्रालय/सचिवालय, जर्मन दूतावास कूटनीतिक नियोग, रोमानियास्थित सम्बन्धित कम्पनी तथा आइसिसी संस्थाको विशेष पहलमा करिब एक महिनाको निरन्तर प्रयासपछि थापाको शव नेपाल ल्याइएको थियो ।
