स्याङ्जामा पहिलोपटक आयोजना गरिएको ‘प्रथम खुमा अर्याल कप’ अन्तरपालिका स्तरीय टी–२० क्रिकेट लिग रनिङ शिल्ड प्रतियोगिता आजदेखि सुरु हुँदैछ । पुतलीबजार नगरपालिका–१ मालेबगरस्थित खेलमैदानमा हुने प्रतियोगिताको आयोजना खुमा अर्याल फाउन्डेसन स्याङ्जाले गरेको हो । प्रतियोगितालाई पुतलीबजार नगरपालिकाको सहयोग र जिल्ला क्रिकेट संघ स्याङ्जाको प्राविधिक साथ रहेको छ ।
प्रतियोगिता दुई चरणमा सञ्चालन हुनेछ । पहिलो चरण माघ २ देखि ४ गतेसम्म चल्नेछ भने दोस्रो चरण माघ ९ देखि १४ गतेसम्म हुनेछ । जिल्लाका ११ वटै स्थानीय तहको सहभागिता रहेको प्रतियोगितालाई चार समूहमा विभाजन गरिएको छ । समूह ‘ए’, ‘बी’ र ‘सी’ मा तीन–तीन पालिका छन् भने समूह ‘डी’ मा दुई पालिका समावेश छन् ।
प्रत्येक समूहको विजेता सेमिफाइनलमा प्रवेश गर्नेछ । सेमिफाइनलमा समूह ‘ए’ र ‘सी’ तथा ‘बी’ र ‘डी’ का विजेताबीच प्रतिस्पर्धा हुनेछ ।
फाउन्डेसनले स्वास्थ्य, शिक्षा, खेलकुद र रोजगारीमा योगदान पुर्याउने उद्देश्यसहित प्रतियोगिता आयोजना गरेको जनाएको छ । क्रिकेटलाई स्याङ्जाको पहिचान बनाउँदै राष्ट्रिय तथा अन्तर्राष्ट्रिय तहमा जिल्लाको नाम चिनाउने लक्ष्य पनि प्रतियोगितासँग जोडिएको फाउन्डेसनका अध्यक्ष लेखनाथ शर्माले बताए ।
प्रत्येक पालिकाको टिममा एक जना अण्डर–१६, दुई जना अण्डर–१९ र दुई जना बाहिरी जिल्लाका खेलाडी समावेश गरिएको छ । प्रतियोगिताको विजेताले दुई लाख रुपैयाँ नगदसहित कप, मेडल र प्रमाणपत्र प्राप्त गर्नेछ । उपविजेताले एक लाख ५० हजार रुपैयाँ, तृतीयले एक लाख र सान्त्वनाले ५० हजार रुपैयाँसहित ट्रफी, मेडल र प्रमाणपत्र पाउनेछन् । लगातार तीन वर्ष विजेता हुने पालिकाले बहुमूल्य रत्न, सुन तथा चाँदी जडित रनिङ शिल्ड हात पार्नेछ ।
यस्तै, प्रत्येक खेलको ‘प्लेयर अफ दि म्याच’ ले पाँच हजार रुपैयाँ पाउनेछ भने प्रतियोगिताका विधागत उत्कृष्ट खेलाडीलाई जनही १० हजार रुपैयाँ पुरस्कार दिइनेछ । प्रतियोगिता सञ्चालनका लागि करिब ६४ लाख रुपैयाँभन्दा बढी खर्च हुने अनुमान गरिएको छ ।
उद्घाटन खेल आज
प्रतियोगिताको उद्घाटन खेल आज समूह ‘बी’ का फेदीखोला र कालीगण्डकी गाउँपालिकाबीच हुनेछ । खेल दिउँसो साढे १२ बजे सुरु हुने फाउन्डेसनका सचिव ध्रुव शर्माले जानकारी दिए । पहिलो दिन एक खेल खेलाइनेछ भने त्यसपछि दैनिक दुई–दुई खेल हुनेछन् ।
आदिल आलम पुतलीबजारबाट खेल्ने
एनपीएल अक्सनका सबैभन्दा महँगो खेलाडी आदिल आलम पुतलीबजार नगरपालिकाबाट खेल्ने पक्का भएको छ । पालिकाले दुई जना बाहिरी खेलाडी समावेश गर्न पाउने प्रावधानअनुसार आलम सहभागी हुने भएका हुन् ।
यसैगरी, राष्ट्रिय खेलाडी इशान पाण्डे र अण्डर–१९ का राष्ट्रिय बलर दीपक डुम्रे गल्याङबाट खेल्नेछन् । राष्ट्रिय खेलाडी अनुज चनरा भीरकोटबाट खेल्ने तय भएको छ । अन्य पालिकाबाट पनि चर्चित खेलाडी सहभागी भएको जिल्ला क्रिकेट संघ स्याङ्जाका अध्यक्ष दीवाकर थापाले बताए ।
