माघ सुरु हुन नपाउँदै स्याङ्जाको खेलकुद वातावरण क्रिकेटले तताउन थालेको छ । पुतलीबजार नगरपालिका–१ सदरमुकाम नजिकै रहेको मालेबगर खेलमैदान केन्द्र बनाएर आयोजना हुन लागेको प्रथम खुमा अर्याल कप अन्तरपालिका टि–ट्वान्टी क्रिकेट लिगका लागि जिल्लाभर उत्साहपूर्ण तयारी देखिएको छ ।
जिल्लाका सबै ११ वटै स्थानीय तहले आफ्ना–आफ्ना पालिकाको प्रतिनिधित्व गर्ने क्रिकेट टिम छनोट प्रक्रिया औपचारिक रूपमा अघि बढाएका छन् । गाउँपालिका र नगरपालिकाले सार्वजनिक सूचना निकालेर छनोट खेलमार्फत खेलाडी छान्न थालेपछि स्थानीय युवामा क्रिकेटप्रतिको आकर्षण थपिएको स्याङ्जा जिल्ला क्रिकेट संघले जनाएको छ ।
फेदिखोला, आँधीखोला, हरिनास, बिरुवा, अर्जुनचौपारी र कालीगण्डकी गाउँपालिका तथा पुतलीबजार, वालिङ, गल्याङ, चापाकोट र भीरकोट नगरपालिकाले आ–आफ्नो टिम छनोटलाई प्राथमिकताका साथ अघि बढाएका हुन् । यसले प्रतियोगितालाई केवल खेलमै सीमित नराखी पालिकाबीचको प्रतिस्पर्धा र पहिचानसँग जोडेको देखिन्छ ।
खुमा अर्याल फाउन्डेसन स्याङ्जाको आयोजनामा, पुतलीबजार नगरपालिकाको सह–आयोजनामा र स्याङ्जा जिल्ला क्रिकेट संघको प्राविधिक सहयोगमा प्रतियोगिता माघ २ गतेदेखि सुरु हुँदैछ । दुई चरणमा सञ्चालन हुने लिगको पहिलो चरण माघ २ देखि ४ गतेसम्म र दोस्रो चरण माघ ९ देखि १४ गतेसम्म हुने फाउन्डेसनका अध्यक्ष लेखनाथ शर्माले जानकारी दिए ।
प्रतियोगिताको तयारी तीव्र गतिमा भइरहेको र अन्तिम टिम दर्ता पुस २९ गतेसम्म खुला रहेको छ । पुरस्कार संरचनाले पनि प्रतियोगितालाई थप आकर्षक बनाएको छ । उपाधि विजेताले बहुमूल्य रत्न जडित रनिङ शिल्डसहित २ लाख रुपैयाँ नगद, ट्रफी, मेडल र प्रमाणपत्र प्राप्त गर्नेछन् । उपविजेताले १ लाख ५० हजार रुपैयाँ, तृतीय टोलीले १ लाख र सान्त्वना टोलीले ५० हजार रुपैयाँसहित ट्रफी र प्रमाणपत्र हात पार्नेछन् । खेलाडीलाई प्रोत्साहन गर्न प्लेयर अफ दि म्याच र बेस्ट प्लेयर पुरस्कारको व्यवस्था पनि गरिएको फाउन्डेसनका अध्यक्ष शर्माले बताए ।
करिब ३ सय खेलाडी सहभागिता रहने अनुमान गरिएको प्रतियोगितामा जिल्लाभित्रका करिब २५० र राष्ट्रिय तथा अन्तर्राष्ट्रिय स्तरका करिब ५० खेलाडी सहभागी हुने अपेक्षा गरिएको छ । प्रतियोगिताका खेलहरू चङ्गा स्पोर्ट्स च्यानलमार्फत प्रत्यक्ष प्रसारण हुने भएपछि स्याङ्जाको क्रिकेट गतिविधि जिल्लाबाहिरसम्म पुग्ने विश्वास गरिएको छ ।
स्थानीय तह, आयोजक र क्रिकेट संघको संयुक्त प्रयासले सुरु हुन लागेको खुमा अर्याल कपले स्याङ्जामा क्रिकेटलाई संस्थागत गर्दै नयाँ पुस्तालाई मैदानतर्फ आकर्षित गर्ने अपेक्षा गरिएको छ ।
