कास्कीको पोखरा महानगरपालिका –८ नयाँबजारस्थित दिर्घायु पोखरा हस्पिटलमा उपचारमा लापरबाही भएको भन्दै एक बिरामीले गुनासो सार्वजनिक गरेका छन् । स्याङ्जा अर्जुनचौपारी गाउँपालिका –१ का ३८ वर्षीय कमलबहादुर क्षेत्री(रोकाहा)ले सानो घाउ देखाएर अस्पताल पुगेपछि बेग्लै ठाउँमा शल्यक्रिया गरिएको दाबी गरेका हुन् ।
गत बिहीबार खुट्टाको पैतालामा सामान्य घाउ “खील” रहेको भन्दै दिर्घायु हस्पिटल पुगेका क्षेत्रीलाई चिकित्सकले शल्यक्रिया आवश्यक भएको बताए । उनले औपचारिकता पूरा गरेर करिब पाँच हजार रुपैयाँ शल्यक्रिया तथा औषधि शुल्क गरी आठ हजार रुपैयाँ बुझाएर घर फर्किए पनि भोलिपल्ट शल्यक्रिया गलत स्थानमा भएको थाहा पाए ।
“घाउ एक ठाउँमा थियो, टाँका अर्कै ठाउँमा । यस्तो त कल्पना पनि गरेको थिइनँ,” क्षेत्रीले भने । उनको भनाइ अनुसार खुट्टा सुन्ने सुई लगाएर शल्यक्रिया भएकाले तत्कालै थाहा नपाए पनि दुखाइ बढेपछि भोलिपल्ट घरमै घाउ हेर्दा गल्ती देखिएको हो ।
शल्यक्रिया गर्ने वरिष्ठ जनरल र ल्याप्रोस्कोपिक सर्जन डा. सुजन श्रेष्ठले भने आफूले सामान्य गल्ती पनि नगरेको जिकिर गरे । तर, उनले उपचारका क्रममा नजिकै अर्को घाउ भएको देखिएको र खील निकालिएको दाबी गर्दै विवाद थप जटिल बनाएका छन् । बिरामीले भने वास्तविक घाउमा कुनै उपचार नै नभएको आरोप दोहोर्याएका छन् ।
अस्पतालका प्रबन्ध निर्देशक राधाकृष्ण पोखरेलले चिकित्सकको बचाउ गर्दै “साना प्राविधिक त्रुटि हुन सक्छन्” भनेका छन् । साथमा, पोखरेलले अस्पतालले शल्यक्रिया खर्च फिर्ता गर्ने र अर्को घाउ नि:शुल्क शल्यक्रिया गरिदिन तयार रहेको पनि बताए ।
तर क्षेत्रीले दिर्घायु हस्पिटलमा पुनः शल्यक्रिया गराउने सम्भावना नदेखाउँदै, “अब त अरु अस्पतालमै उपचार गर्छु,” भन्ने प्रतिक्रिया दिएका छन् । यस घटनाले स्वास्थ्य सेवामा सावधानी र जिम्मेवारीप्रति गम्भीर प्रश्न उठाएको छ ।
