स्याङ्जाको वालिङ नगरपालिका –५ द्वारभञ्ज्याङका १३ वर्षीय निशान थापा आफ्नै घरको बाकसभित्र मृत फेला परेका छन् ।
यहाँको सरस्वती आधारभूत विद्यालय मिनाङकोटमा कक्षा ८ मा अध्ययनरत निशान आइतबार परीक्षा सकेर घर फर्किएका थिए । तर, साँझपख उनी हराएपछि आमाले खोजी गर्दा घरको आटीमा राखिएको बाकसभित्र उनको शव भेटिएको स्थानीयले बताएका छन् ।
घटनाको समयमा घरमा उनकी बहिनी मात्रै थिइन् भने आमा छिमेकीको मेलामा गएकी थिइन् । मेलाबाट फर्किएपछि छोराको खोजी गर्ने क्रममा यो रहस्यमय घटना खुलेको हो ।
सूचना पाएलगत्तै आइतबार राति नै प्रहरी टोली घटनास्थल पुगेको थियो । ‘घटनाबारे सूक्ष्म अनुसन्धान भइरहेको छ,’ जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक प्रशन्न राज चौधरीले भने ।
विशेषज्ञद्वारा पोष्टमार्टम गर्नुपर्ने भएकाले शव परीक्षणका लागि सोमबारनै पोखरा पठाइएको र सम्भवतः आज शवको पोष्ट्मार्टम हुने सूचना अधिकारी चौधरीले बताए ।
हाल घटनास्थललाई प्रहरीको निगरानीमा राखिएको छ भने घटनाबारे थप अनुसन्धान भइरहेको प्रहरीको भनाइ छ ।
