स्याङ्जाको वालिङ नगरपालिकाले स्थानीय तहमा तरकारी उत्पादन बढाउने र किसानलाई प्रोत्साहन गर्ने उद्देश्यले प्रतिकिलो ५ रुपैयाँका दरले नगद अनुदान वितरण थालेको छ । ‘उत्पादनमा आधारित प्रोत्साहन अनुदान कार्यक्रम’ अन्तर्गत सञ्चालित यस योजनाले १२७ जना किसानलाई प्रत्यक्ष लाभ पुर्याएको छ ।
नगर उपप्रमुख कविता तिवारी गैरेका अनुसार वालिङलाई कृषि क्षेत्रमा आत्मनिर्भर बनाउन विभिन्न कार्यक्रमहरू अघि बढाइएको छ । “किसानले ढुक्कसँग उत्पादन गर्नुहोस्, बजारको ग्यारेण्टी स्थानीय सरकारले गर्छ,” उपप्रमुख तिवारीको भनाइ छ ।
गत आर्थिक वर्ष २०८१/८२ मा किसानले उत्पादन गरेको तरकारीको बिक्री तथ्यांकका आधारमा अनुदान वितरण गरिएको प्रमुख प्रशासकीय अधिकृत गंगालाल सुवेदीले जानकारी दिए । त्रियासी कृषि उपज तथा बजार व्यवस्थापन सहकारी संस्थामार्फत वितरण गरिएको यस अनुदान कार्यक्रम अन्तर्गत कुल ६ लाख ६८ हजार रुपैयाँ प्रदान गरिएको हो ।
कृषि शाखा प्रमुख सुभाषचन्द्र अर्यालले न्यूनतम दुई रोपनी क्षेत्रफलमा एकै प्रकारको तरकारी खेती गर्ने किसानलाई कुल उत्पादन लागतको २० प्रतिशतसम्म प्रोत्साहन अनुदान दिइएको जानकारी दिए ।
सहकारीका अध्यक्ष अर्जुन प्रकाश अर्यालका अनुसार पछिल्लो ६ महिनामा मात्रै १ लाख ३३ हजार ७ सय ७७ केजी तरकारी संकलन गरिएको छ, जुन ४० वर्षयताकै उच्चतम परिमाण हो । उनले सहकारीमार्फत प्रोत्साहन कार्यक्रमबापत ६ लाख ६८ हजार ८८५ रुपैयाँ प्राप्त भएको बताए ।
यस कार्यक्रमले वालिङ नगरभित्र व्यावसायिक तरकारी तथा फलफूल खेतीतर्फ किसानको आकर्षण बढाएको छ र दर्जनौं किसानलाई प्रत्यक्ष रूपमा लाभ पुगेको छ ।
