राष्ट्रिय स्वतन्त्र पार्टी (रास्वपा) स्याङ्जाका नेता प्रकाश अर्यालले कुटपीट गरेको भन्दै एक मजदुर प्रहरीकहाँ पुगेका छन् ।
पीडित भनिएका राजकुमार राईले उनीविरुद्ध वडा प्रहरी कार्यालय वालिङमा उजुरी दिएपछि सोमबारको घटना मंगलबार बाहिर आएको हो ।
अर्यालले कुटपीट गरेको भन्दै मजदुरले निवेदन दिएपछि प्रहरीले उनलाई नियन्त्रणमा लिएको छ । वडा प्रहरी कार्यालय वालिङमा मंगलबार मजदुरले निवेदन दिएपछि प्रहरीले घटनाबारे अनुसन्धान गर्न नियन्त्रणमा लिएको जनाएको छ ।
स्याङ्जाका प्रहरी प्रमुख एसपी दधिराम न्यौपानेले अर्याल प्रहरी नियन्त्रणमा रहेको पुष्टि गरे । उनले भने, ‘कुटपीट भएको भन्दै निवेदन आएपछि घटनामा संलग्लनताबारे अनुसन्धानका लागि मंगलबार नियन्त्रणमा लिएका हौं ।’
प्रहरीले आवश्यक कारबाही प्रक्रिया अघि बढाइएको जनाएको छ । हिजोदेखि नै अर्याल प्रहरी हिरासतमा छन् ।
घटना विवरणअनुसार मिस्त्री काम गर्ने राई सोमबार साँझ काम सकेर कोठामा बसिरहेका थिए । त्यसैबेला अर्याल नेतृत्वको समूह अश्लिल गालीगलौज गर्दै आक्रमणमा उत्रिएको ती मजदूरको गुनासो छ । ‘यहाँ फेरि देखे भने मारिदिन्छु’ भन्दै धम्की समेत दिएको उजुरीमा उल्लेख गरिएको छ ।
‘प्रकाश अर्यालसहितका व्यक्तिहरुले कुनै कारण बिना नै अश्लिल शब्द प्रयोग गर्दै मलगायत मेरा साथीहरुलाई कुटपिट गरे’, उजुरीमा भनिएको छ, ‘कुटपिटबाट म र मेरा साथीहरु घाइते भएका छौँ ।’
कुटपिटमा संलग्नहरुलाई तत्काल पक्राउ गरेर कानुनी कारवाही गर्न उनले माग गरेका छन् ।
अर्यालले ०८४ को निर्वाचनमा वालिङ नगरपालिकाको मेयर बन्ने भन्दै स्थानीय सरकारविरुद्ध अभियान चलाइरहेका छन् । उनले त्यहाँका मेयर, उपमेयर र अन्य जनप्रतिनिधिविरुद्ध पनि दुष्प्रचार गर्दै आएको बताइन्छ ।
उनको सामाजिक सञ्जाललाई अध्ययन गर्ने हो भने कारगारमा रहेका पार्टी सभापति रवि लामिछानेको पक्षमा विभिन्न सामाग्री प्रचारप्रसार गरेको देखिन्छ । सहकारी ठगी प्रकरणमा कारागार पुगेका लामिछानेलाई छुटाउन उनले हस्ताक्षर संकलन अभियान समेत चलाइरहेका छन् ।
