स्याङ्जामा नेपाल प्रहरीले भीरबाट लडेका एक व्यक्तिलाई सकुशल उद्घार गरेको छ । भीरबाट लडेका सुर्खेतको गुर्वाकोट नगरपालिका – १४ घर भई कामको सिलसिलामा स्याङ्जाको पुतलीबजार नगरपालिका – १४ सेवादी बस्ने ४३ वर्षीय चित्र बहादुर पुनलाई सकुशल उद्घार गरिएको स्याङ्जा प्रहरीले जनाएको छ ।
जिल्ला प्रहरी कार्यालय स्याङ्जाका अनुसार मंगलबार राती करिब साढे दस बजे पुन आफू बसेको घर नजिकै पिसाब फेर्न निस्किएका थिए । पिसाब फेर्न निस्किएका पुन भीरबाट करिब एक सय मिटर तल खसेको जिल्ला प्रहरी कार्यालय स्याङ्जाका प्रवक्ता एवं सूचना अधिकारी प्रहरी नायब उपरीक्षक प्रशन्न राज चौधरीले जानकारी दिए ।
उक्त घटनाको सूचना पाउनसाथ जिल्ला प्रहरी कार्यालय स्याङ्जाबाट खटिएको प्रहरी टोलीले भीरबाट खसेका पुनलाई बुधबार राती करिब साढे १२ बजे भीरको खोचबाट गम्भीर अवस्थामा उद्घार गरेको प्रवक्ता चौधरीले बताए ।
भीरबाट लडेर गम्भीर घाइते भएका पुनलाई तत्कालै प्रदेश अस्पताल पुतलीबजार स्याङ्जामा सामान्य उपचार पश्चात् थप उपचारका लागि गण्डकी मेडिकल कलेज पोखरा पठाइएको प्रहरीले जनाएको छ ।
