स्याङ्जाको पुतलीबजार नगरपालिका – ९ काल्खुमा सम्पन्न ‘ऐतिहासिक काल्खु मेला’मा पुरुष भलिबल प्रतियोगितातर्फको उपाधि कालीकोटले जितेको छ ।
जनसम्पर्क युवा क्लबद्वारा गत चैत्र पूर्णिमा (३० गते) देखि आयोजना गरिएको साविक वडा स्तरीय पुरुष भलिबल प्रतियोगिताको फाइनल खेलमा आइतबार ओरस्टेलाई ३ – २ को सेटले हराउँदै कालीकोटले उपाधि जितेको हो ।
उपाधिसँगै कालीकोटलाई नगद ८१ हजार रुपैयाँ, रनिङ शिल्ड तथा मेडलसहित प्रमाणपत्र प्रदान गरिएको क्लबका अध्यक्ष दिपक रानामगरले जानकारी दिए ।
उनका अनुसार उपविजेता टोली ओरस्टेले नगद ४१ हजार रुपैयाँ, शिल्ड तथा मेडलसहित प्रमाणपत्र प्राप्त गर्यो भने तृतीय स्थान हाँसिल गरेको गहते ‘टिम बि’ ले नगद २१ हजार रुपैयाँ, शिल्ड तथा मेडलसहित प्रमाणपत्र हात पार्यो ।
सो प्रतियोगिताबाट ओरस्टेका लब्सन सुनार सर्वोत्कृष्ट खेलाडीका रुपमा पुरस्कृत भए ।
यसैगरी, सोही टिमकै कृष्ण थापा उत्कृष्ट ब्लकर, कालीकोटका सञ्जय गुरुङ उत्कृष्ट स्पाइकर, सोही टिमकै विवश थापा उत्कृष्ट डिफेन्डर र गहतेका सुजित थापामगर उत्कृष्ट लिफ्टरका रुपमा पुरस्कृत भए ।
कुल ३५ टिमको सहभागिता रहेको सो प्रतियोगितामा अनुशासित टिमका रुपमा सालडाँडा जामुने नगद रु १२ हजारसहित पुरस्कृत बन्यो ।
स्थानीय कला तथा संस्कृतिको प्रदर्शनीमा जागृति संस्था प्रथम
स्थानीय कला तथा संस्कृतिको प्रदर्शनीमा जागृति टोल विकास संस्था प्रथम बन्यो ।
कुल ६ समूहको सहभागिता रहेको सो प्रदर्शनीमा प्रथम बनेको जागृति टोल विकास संस्था नगद रु १० हजारसहित पुरस्कृत बन्यो । जागृति टोल विकास संस्थाले काल्खुले कुसिन्डे भाका प्रस्तुत गरेको थियो ।
यस्तै, उपविजेता बनेको जिवन ज्योती टोल विकास संस्थाले झ्याउरे भाका प्रस्तुत गरेको थियो । जिवन ज्योतीले नगद रु ५ हजार प्राप्त गर्यो ।
उक्त प्रतियोगिताले स्थानीय संस्कृतिको संरक्षण गर्न सघाउ पुर्याएको क्लबका प्रमुख सल्लाहकार जिवन थापामगरले बताए ।
मेलाका विभिन्न प्रतियोगिताको विजेता तथा उपविजेता खेलाडी तथा समुहलाई पुतलीबजार नगरपालिकाका प्रमुख तुलसी रेग्मी, नगर प्रवक्ता मनोज पौडेल, शुक्लागण्डकी नगरपालिका ११ का वडाध्यक्ष शालिकराम भट्टराई, पुतलीबजार नगरपालिकाका विधान समितिका संयोजक तथा वडा १४ का सदस्य मुवारक मिया, पुतलीबजार नगरपालिका ३ की वडासदस्य सविता पौडेल, पुरस्कारदाताहरु, स्थानीय अग्रजहरुलगायतले पुरस्कार वितरण गरेका थिए ।
