नेपालमै पहिलोपटक निर्माण भएको नवग्रह मन्दिरको अनुष्ठान, गीता ज्ञान महायज्ञ तथा धार्मिक महोत्सव सम्पन्न भएको छ । स्याङ्जाको अर्जुनचौपारी गाउँपालिका – १ जलबराह धार्मिक वनमा निर्माण भएको नेपालकै पहिलो नवग्रह मन्दिरको अनुष्ठान, गीता ज्ञान महायज्ञ तथा धार्मिक महोत्सवमा एक लाख २५ हजार भन्दा बढी भक्तजनले पूजाआजा तथा दर्शन गरेका छन् ।
१४४ बर्षमा आएको महाकुम्भको समयमा फागुन ६ गतेबाट नौ दिन महाशिवरात्रीसम्म धार्मिक महोत्सव गरिएको हो । पहिलो दिनबाटै भक्तजनको भीड लागेको नवग्रह मन्दिरमा दैनिक जसो लाइनमा बसेर भक्तजनले पूजा तथा दर्शन गर्नु परेको थियो । धार्मिक महोत्सवमा छिमेकी देश भारत, नेपालभित्रका सबै जिल्लाका भक्तजनले यहाँको नवग्रह मन्दिरमा पूजाआजा र दर्शन गरेको गाउँपालिका अध्यक्ष प्रकाश तिवारीले बताए ।
महोत्सवमा एक लाख भक्तजन भित्रने अनुमान गरिएकोमा सो भन्दा धेरै भक्तजनले पूजाआजा गरेको तिवारीले जानकारी दिए । महोत्सवमा एक करोड २५ लाख दीप प्रज्वलन, चार बेदको पाठ पारायण, गायत्री मन्त्रद्धारा सवालाख हवन, धार्मिक अन्तरक्रिया, सन्ध्याकालिन महाआरती तथा भजनकृतन गरिएको थियो ।
नवग्रह मन्दिर अनुष्ठान एवं धार्मिक महोत्सवमा आचार्य श्री चैतन्य कृष्ण महाराज गूरु प्रमुख वाचक रहेका थिए भने डाक्टर केएन स्वामी, युवा पण्डित प्रशान्त ढकालले समेत धार्मिक प्रवचन दिएका थिए ।
१५७ रोपनी क्षेत्रफलमा फैलिएको यस धार्मिक वनमा नवभूज आकारको आकाशतर्फ फर्केको २७ फिट अग्लो नवग्रह मन्दिर बनाइएको छ ।
महोत्सवको समापनमा संघीय सांसद राजु थापाले नवग्रह मन्दिर देशकै धार्मिक पर्यटनको पहिचान बनेको बताएका थिए । यसलाई प्रदेश र संघीय सरकारले सहयोग गर्नुपर्ने र पवित्र भूमिमा विश्वब्यापी रुपमा प्रचार गर्न सरकार लाग्नुपर्ने थापाको भनाई थियो ।
थापाले यस मन्दिरमा नसोचेको श्रद्धालु भक्तजन आएको र समग्र जिल्लाको धार्मिक पर्यटकको नयाँ आयाम थपेको बताए । विज्ञान र धर्मलाई जोडेर नवग्रह बनेको र भावी दिनमा विद्यार्थीको अध्यनको माध्यम बन्ने थापाले बताए ।
यहाँको शैक्षिक, धार्मिक तथा पूर्वाधार निर्माणमा सहयोग गर्ने बताउँदै सांसद थापाले यसलाई अगाडि बढाउन सबैको साथ र सहयोग आवश्यक रहेको बताए ।
महोत्सवको समापनमा नेपाल उद्योग वाणिज्य महासंघका उपाध्यक्ष सुरकृष्ण बैद्य, गाउँपालिका अध्यक्ष प्रकाश तिवारी, उपाध्यक्ष सपना गुरुङ लगायतले मन्तब्य राखेका थिए ।
महोत्सवको अन्तिम दिन महाशिवरात्रीमा गायक टेक नारायण चापागाईं र गायिका देवी घर्ती मगरको स्वरमा रहेको नवग्रह भजन ‘नवग्रह तिम्रै चरणमा छौं, तिम्रै सरण पर्छौँ’ बोलको गीतको भिडियो छायांकन समेत गरिएको थियो ।
