आफ्नी बहिनी र छोरीसहित स्याङ्जा आएका पूर्व राजा ज्ञानेन्द्र शाहले कुल मन्दिरको दर्शन गरेका छन् ।
यहाँको कालीगण्डकी गाउँपालिका – ३ मा रहेको शाह वंशीय कुल मन्दिर आलमदेवी मन्दिरमा पूर्व राजा शाहले मंगलबार पूजा अर्चना एवं दर्शन गरेका हुन् ।
आफ्नो कुल देवताको मन्दिर आलमदेवी मन्दिरमा रुद्रीपुजनसहित पूजा अर्चना गरेपछि उनी पोखरा फर्किएको उनको सचिवालयले जनाएको छ । नेपालमा गणतन्त्र आएपछि पहिलोपटक पूर्व राजा शाह आफ्नो कुल देवताको मन्दिरमा आएको सचिवालयले जनाएको छ ।
सोमबार वालिङ् आएर बसेका उनलाई राजमार्गमा स्थानीयले स्वागत समेत गरेका थिए । उनका समर्थकहरुले ‘राजा आउ देश बचाउ’ भन्दै नारा समेत लगाएका थिए ।
