अर्जुनचौपारीमा बनेको नेपालकै पहिलो नवग्रह मन्दिरको अनुष्ठान, गिता ज्ञान तथा धार्मिक महोत्सवमा एक करोड २५ लाख दीप प्रज्वल गरिएको छ । दीप प्रज्वलनमा हजारौंको संख्यामा भक्तजनको सहभागिता रहेको थियो ।
अर्जुनचौपारी गाउँपालिका – १ जलबराह धार्मिक वनमा निर्माण भएको नवग्रह मन्दिरमा अनुष्ठानको सातौं दिनमा सवा करोड दीप प्रज्वलन गरिएको हो । यहाँको पञ्चकन्या मन्दिर, षट्कोण शिवालय र नवग्रह मन्दिरमा दीप प्रज्वलन गरिएको हो ।
गत वर्ष शिवरात्रीको दिनमा सुरुवात गरेर पालिकाले एक वर्षमै देशकै पहिलो नवग्रह मन्दिर निर्माण गरेको हो । १४४ वर्षमा आएको महाकुम्भको समयमा महाशिवरात्रीको अवसर पारेर यहाँ नवग्रह मन्दिरको प्राण प्रतिष्ठा तथा अनुष्ठाण र धार्मिक महोत्सव गरिएको हो ।
उक्त महोत्सवमा दिनहुँ हजारौं भक्तजनले पुजाआजा तथा दर्शन गरेका छन् । मन्दिरमा पुजा तथा दर्शनको लागि दैनिकजसो भक्तजनको घुइँचो लाग्दा लाइन लगाउनु परेको छ ।
नवग्रह मन्दिरको अनुष्ठान, गिता ज्ञान तथा धार्मिक महोत्सवको सातौं दिनसम्म ७५ हजारभन्दा बढी भक्तजनले पुजाआजा तथा दर्शन गरेको गाउँपालिका अध्यक्ष प्रकाश तिवारीले जानकारी दिए । जिल्ला मात्र नभई छिमेकी जिल्लाहरु तथा अन्य प्रदेशका भक्तजन समेत यहाँ आएर पुजाआजा तथा दर्शन गरेको अध्यक्ष तिवारीको भनाइ छ ।
दीप प्रज्वलनसङ्गै यहाँ चार वेदको पाठ पारायण, गायत्री मन्त्रद्वारा सवालाख हवन, धार्मिक अन्तरक्रिया, सन्ध्याकालिन महाआरती तथा भजनकृतन चलिरहेको छ ।
यस महोत्सवमा आचार्य श्री चैतन्य कृष्ण महाराज गुरु प्रमुख वाचक रहेका छन् भने डा. केएन स्वामीले समेत शनिबार धार्मिक प्रवचन दिएका थिए ।
घर तथा शक्तिपीठमा नवग्रहको प्रतिमा राखेर पूजा गर्ने गरिएकोमा यहाँ नेपालकै पहिलोपटक नवग्रह मन्दिरको निर्माण गरिएपछि दर्शन तथा पूजाअर्चना गर्न पाइने भएको हो ।
१५७ रोपनी अर्थात् आठ हेक्टर क्षेत्रफलमा फैलिएको यस धार्मिक वनमा नवभुज आकारको २७ फिट अग्लो नवग्रह मन्दिर बनाइएको छ । यस मन्दिरमा रहने पिल्लरको सबैभन्दा माथि आकाशतर्फ फर्काएर सौर्यमण्डलीय ब्रह्माण्डको प्रतीक राखिएको छ ।
पिल्लरको १४ फिटमा सूर्य, शुक्र, केतु, चन्द्र, मंगल, बुध, शनि, बृहस्पति र राहुका प्रतीक राखिएको छ भने पिल्लरको नौवटा भुजामा ग्रह अनुसारका रंग लगाइएको छ । नवग्रह मन्दिरसङ्गै षट्कोण शिवालय बनाइएको छ भने यसको बीचमा पशुपतिनाथको जस्तै पञ्चमुखी शिवलिङ्ग (सात क्वीन्टल) र कोणमा गणेश, कुलदेवता, लक्ष्मी, कालभैरव, हनुमानको मूर्ति राखिएको छ ।
मन्दिरमा षट्कोणको एक छेउबाट प्रवेश गरेर गणेश, कुलदेवता (तेलको पोखरी), इष्टदेवताको पूजा गरेर बीचमा रहेको पञ्चमुखी शिवलिङ्गको दुई पटक घुमेर पूजा गरेसङ्गै हनुमान, लक्ष्मी, कालभैरवको पूजा गरेर बाहिर निस्किने बनाइएको छ ।
यहाँ नव्रग्रह यन्त्र, शिवयन्त्र र एक मण्डला समेत निर्माण गरिएको छ भने मन्दिरमा विवाह नहुने हुँदा सँगै रहेको राधाकृष्ण मन्दिरको मर्मत समेत गरिएको छ । यहाँ षट्कोण शिवालयका मूर्तिको अस्तित्वमा रहेको कर्णको मूर्ति नवग्रह फर्काएर करिब तीन मिटर पूर्वको जङ्गलमा राखिएको छ ।
अनुष्ठानपछि नवग्रह मन्दिर शनिबार मात्र खुला हुनेछ भने नौमध्ये एक चक्रमा भने हरेक दिनमा पनि पूजा गर्न सकिने छ । सौर्यमण्डलीय ब्रह्माण्डको मूर्ति भने हरेक वर्षको गणेश चतुर्थीमा मात्र हेर्न पाइने छ भने सो दिन पालिका नै बिदा गरेर पूजा गरिने छ ।
मूल नवग्रह मन्दिर पालिकाको वडा नं. – १ मा रहेपनि अन्य नौवटा निशान प्रतीमा पालिकाका अन्य पाँच वडा तथा भौगोलिक स्वरूप ब्रह्माण्डीय स्वरूपमा घुमेर रहेको भीरकोट नपाको वडा नं – ७, पुतलीबजार नपाको वडा नं – १३ र १४ र आँधीखोला गापा – १ मा निशान प्रतिमालाई आलोपालो पूजा गर्ने प्रबन्ध मिलाइने छ भने नौ वर्षमा सबै निशान पहिलाको ठाउँमा पुग्ने छन् ।
नव्रग्रह मन्दिर बनेको यस जल वराह धार्मिक वनभित्र ग्रह अनुसारका बिरुवा समेत रोपिएको छ ।
