पोखरा । पृथ्वी नारायण क्याम्पसका सहप्राध्यापक रबिराज बराललाई बिदाई गरिएको छ । सेवा निवृत्त भएका इतिहास विभागका सहप्राध्यापक बराललाई बुधबार क्याम्पसमा एक समारोहका बीच बिदाई गरिएको हो । उक्त अवसरमा बराललाई सम्मान पनि गरिएको थियो ।
कार्यक्रमका प्रमुख अतिथि निमित्त क्याम्पस प्रमुख डा. मिनराज लम्सालले शिक्षण जीवनमा बरालको योगदानको चर्चा गर्दै सुखद् निवृत्त जीवनको कामना गरे ।
इतिहास विभागका प्रमुख बसन्तप्रसाद पराजुलीले सहप्राध्यापक बरालसँगको सौहार्द सम्बन्धको स्मरण गर्दै सक्रिय र स्वस्थ जीवनको लागि शुभकामना दिए ।
इतिहास विभागको तर्फबाट बिदाई मन्तव्य राख्दै सहप्राध्यापक अर्जुन बहादुर भण्डारीले बरालको शैक्षिक व्यक्तित्व र जीवनका बारेमा चर्चा गरेका थिए । पूर्व विभागीय प्रमुख राधा भण्डारीले बरालसँगको लामो सहकार्यका अनुभव साझा गरे ।
कार्यक्रममा विद्यार्थी कल्याण तथा खेलकुद विभाग प्रमुख बोधराज ढकाल, क्याम्पसमा कार्यरत कर्मचारीको तर्फबाट पूर्णबहादुर गुरुङ, विद्यार्थीहरुको तर्फबाट विपिन आचार्यलगायतले शुभकामना व्यक्त गरे ।
इतिहासका विभागीय प्रमुख बसन्त प्रसाद पराजुलीको अध्यक्षतामा भएको कार्यक्रमको सञ्चालन विभागका उपप्राध्यापक नारायणप्रसाद ढकालले गरेका थिए ।
- रेशम केस
