पोखरा । गण्डकी प्रदेशका प्रमुख डिल्लीराज भट्टले सभ्य समाज निर्माणका लागि नैतिक शिक्षाको खाँचो औंल्याएका छन् ।
पोखरा १५ स्थित श्यामा–श्याम सत्संग पोखराको वार्षिक साधारणसभा तथा अधिवेशनमा प्रमुख अतिथि भट्टले जीवनको मुक्ति साधना रहेको र सफलताका लागि कर्म अनिवार्य भएको बताए ।
भट्टले भने – हाम्रो जीवनको मुक्ति साधना हो । साधना विना कुनैपनि क्षेत्रको सफलता सम्भव छैन । सफलताको लागि कर्म गर्नुपर्दछ । कर्म असल भयो भने मात्र सफलता सम्भव छ ।
पञ्चममूल जगद्गुरू भक्तियोगरसावतार श्री कृपालुमहाप्रभुले जीव कल्याण हेतु अनुकरणीय शास्त्रसम्मत सिद्धान्त प्रतिपादन गरेको भन्दै उनले मानव जीवनको असल चालचलनले स्वच्छ एवं नैतिक समाजको निर्माण गर्न सघाउ पुग्ने बताए ।
प्रदेश प्रमुख भट्टले असल कर्म गर्नु नै धर्म रहेको बताउँदै कर्म असल भयो भने फसल वा फल पनि असल नै प्राप्ति हुने र खराब कर्म अर्थात् कुकर्मको फल खराब नै हुने उल्लेख गरे ।
महापुरुषहरूको संगत र कृपाद्वारा शक्ति प्राप्त गर्न सकिनेमा उनले जोड दिए । उनले भने – ‘दया, माया, करुणा नै एउटा साधकको साधना हो । अरूमा दोष देख्ने प्रवृत्ति आफैमा खराब हो । तसर्थ अरूमा दोष हैन, असल कुरा देख्न सकियो भने मात्र आफूभित्रको शक्ति पत्ता लगाउन र जित्न सकिन्छ । अरूमा दोष देख्ने प्रवृत्तिले आफैमा अहंकार मात्र बढाउँछ ।’
धर्म, अध्यात्म र साधना भनेको समाजका ऐना भएको र यसले असल समाज निर्माण गर्ने बाटोमा अगाडि बढाउने उल्लेख गरे ।
कार्यक्रममा पोखरा १५ का वडाध्यक्ष तोरण बानियाँले श्यामा श्याम सत्संगले उत्कृष्ट कार्य गर्दै आएको भन्दै वडाले सहकार्य गरेर अघि बढिरहेको बताए ।
