अर्जुनप्रसाद मैनाली । रगत दान अभियानमा लाग्ने जो कोहिले सम्झने नाम ।
उनलाई नपुग्दो के थियो र ? ३६ वर्ष अनवरत रक्तदान र यस सम्बन्धित गतिविधिमा योगदान गरेवापत ब्लड डोनर्स एसोसिएसन नेपालले ’द गिफ्ट अफ लाइफ’ प्रकाशित गरेको छ । अमेरिकाको न्युयोर्क राज्यको ओयस्टर बे टाउनले डिसेम्बर २२ लाई विश्व रक्तदाता अर्जुन मैनाली दिवस घोषणा नै गरिसकेको छ ।
६ वटा महादेशका २० देशहरू पुगेर २०६ पटकमा १०३ लिटर रगत दान गरिसेकका मैनालीले नेपाल र अमेरिकामा रक्तदान गर्न अभिप्रेरणामुलक सयौँ कार्यक्रम सम्पन्न गरिसकेका थिए । तर, यसरी अरुको जीवन बचाउने मैनाली आज आफै जीवन त्याग्न पुगेका छन् ।
छोरीको बिहे सम्पन्न गरी ४ दिन अघि मात्रै अमेरिका पुगेका उनले भाडाको गाडीमा आगो लगाएर आफैलाई जलाएका छन् । अमेरिकामै रहेका लेखक पुरूषोत्तम ढकालले उनको आत्महत्या पुष्टि गरेका छन् ।
श्रीमति तारा कोइरालाको नाममा फेसबुकमा आत्महत्याको कारण उल्लेख गर्दै नोट पनि छाडेका छन् ।
आफ्नो सालो रमेशकुमार कोइराला र उनकी श्रीमती अस्मिताका कारण आत्महत्याको परिस्थितिमा पुगेको उल्लेख गरेका छन । १० महिनाअघि सालो रमेश र अस्मिताको दुर्वचनले यो अवस्थामा पुगेको उल्लेख गर्दै उनले छोरीको बिहेपछि यो संसार त्याग्ने सोच बनाएको पनि लेखेका छन् । सालोको अपमानका कारण आफ्नो छोराले रातभर सुत्न नपाएको र परीक्षा समेत बिग्रिएको उल्लेख गर्दै शव्द वचनको हतियारले सालोले आफूलाई गत अप्रिलमै मारेको भनेका छन् ।
उनले अर्को जुनी मन नभएको तर पाएमा त्यो जुनीमा पनि ताराकै श्रीमान् बन्न पाउँ भन्ने कामना समेत गरेका छन् । १५ दिन अघि मात्रै उनले छोरीको बिहे गरे । नेपालमा रहँदा सुनसरी जिल्लाका पाँच वर्षीय बालकका लागि २०६ औं पटक रगत दान गरेका थिए । रक्तदान अभिमुखीकरण कार्यक्रमहरुमा पनि उनी पुगे ।
विश्वका धेरै देशमा घुमेर रगत दान गरेका मैनाली रक्तादनसम्बन्धी कार्यक्रममा अमेरिका जाँदा पछि परिवारसँग उतै सेटल भएका थिए । त्यसपछि पनि उनी रगत दान र यस गतिविधिमा देश विदेश धाइरहन्थे । मैनालीले मकाउ, आयरल्याण्ड, अष्ट्रेलिया, मलावी, इक्वेडर, हैटी, युगान्डा, भारत, क्यानडा, बेलायत, बर्मुडा, केन्या, अर्जेन्टिना, मेक्सिको, घाना, थाइल्याण्ड, इथियोपिया र रुवान्डामा पुगेर पनि रगत दान गरेका छन् ।
मैनालीले सामाजिक सञ्जालमा आत्महत्याको कारण बताउँदै श्रीमतिको नाममा यस्तो पत्र लेखेका छन्ः
