मीना सिर्जनशील समावेशी पत्रकारिता पुरस्कारबाट पत्रकार बिना कुमारी थापा ‘बिनु’ सम्मानित भएका छन् । उक्त पुरस्कारको राशी नगद २० हजार १ सय ११ रुपैयाँ रहेको छ ।
गण्डकी प्रदेशका पूर्व सांसद, उद्यमी तथा समाजसेवी मीना गुरुङले आफ्नो जन्मोत्सवको अवसरमा स्थापना गरेको पुरस्कार २०७९ बाट बिनु सम्मानित भएकी हुन् । गण्डकी प्रदेशका उर्जा, जलस्रोत तथा खानेपानीमन्त्री सरस्वती अर्याल तिवारीले नगद, दोसल्ला र प्रमाणपत्रले सम्मान गरिन् । मन्त्री अर्यालले पत्रकार महिला विभिन्न चुनाैतीका बीच पत्रकारिता क्षेत्रमा सक्रिय रहनु खुशीको कुरा भएको बताइन् ।
संयोजक पुण्य पौडेल, सदस्यहरु दुर्गा अधिकारी, दीपक परियार, विमला भण्डारी र माधव बरालको छनोट समितिले उक्त पुरस्कार २०७९ का लागि बिनुको नाम सिफारिस गरेको थियाे ।
सम्मानित पत्रकार बिनु हाल पोखरा टेलिभिजनमा कार्यरत छिन् । २०६८ सालमा गण्डकी टिभीमा मगर भाषाको समाचार वाचिकाबाट पत्रकारिता सुरु गरेकी बिनुले कान्तिपुर दैनिक, फेवा टेलिभिजन र गोर्खाली रेडियोमा पनि काम गरिसकेकी छिन् । हाल उनी नेपाल आदिवासी जनजाति पत्रकार महासंघ कास्की शाखाकी उपाध्यक्ष र नेपाल मगर पत्रकार संघ कास्कीकी अध्यक्ष छिन् ।
यो पुरस्कारबाट यसभन्दा अघि दुर्गा भण्डारी, दीपक परियार, शान्ति गुरुङ, सरिता तिम्सिना पगेनी, खेम सारु मगर, स्मिता अधिकारी, रोशनी गुरुङ र रविना आले सम्मानित भइसकेका छन् । यसै कार्यक्रममा मीना सिर्जनशील समावेशी पत्रकारिता पुरस्कार २०८० बाट पत्रकार बालकुमारी पौडेल ‘तारा’ पनि सम्मानित भएकी हुन् ।
