मीना सिर्जनशील समावेशी पत्रकारिता पुरस्कार – २०८० बाट पत्रकार बालकुमारी पौडेल ‘तारा’ सम्मानित भएकी छन् । उक्त पुरस्कारको राशी नगद २० हजार १ सय ११ रुपैयाँ रहेको छ ।
गण्डकी प्रदेशका पूर्व सांसद, उद्यमी तथा समाजसेवी मीना गुरुङले आफ्नो जन्मोत्सवको अवसरमा स्थापना गरेको पुरस्कार २०८० बाट तारा सम्मानित भएकी हुन् । गण्डकी प्रदेशका उर्जा, जलस्रोत तथा खानेपानीमन्त्री सरस्वती अर्याल तिवारीले नगद, दोसल्ला र प्रमाणपत्रले सम्मान गरिन् । मन्त्री अर्यालले पत्रकार महिला विभिन्न चुनाैतीका बीच पत्रकारिता क्षेत्रमा सक्रिय रहनु खुशीको कुरा भएको बताइन् ।
संयोजक पुण्य पौडेल, सदस्यहरु दुर्गा अधिकारी, दीपक परियार, विमला भण्डारी र माधव बरालको छनोट समितिले उक्त पुरस्कार २०८० का लागि ताराको नाम सिफारिस गरेको थियाे ।
सम्मानित पत्रकार ताराले २०६८ सालमा यूनाइटेड राष्ट्रिय दैनिकबाट पत्रकारिता सुरु गरेकी हुन् । उनी हाल सिटीपोखरा डटकमको सञ्चालक/सम्पादक भएर काम गरिरहेकी छिन् । यसभन्दा अघि उनले रेडियो नेपाल, रेडियो सफलता, रेडियो जननी, बिग एफ एम, रेडियो आकाशवाणी, ईसांग्रिला डटकम, टप नेपाल न्यूज डटकममा काम गरिसकेकी छिन् ।
उनले नेपाल वातावरण पत्रकार समूहद्धारा सञ्चालित टेलिभिजनमार्फत प्रसारित भएको कार्यक्रम नयाँ पुस्तामा पनि काम गरेकी थिइन् । नेपाल पत्रकार महासंघको गण्डकी प्रदेश परिषद सदस्य, खेलकुद पत्रकार मञ्च गण्डकीको साधारण सदस्य, अनलाइन पत्रकार संघ गण्डकीको संस्थापक सचिव, सञ्चारिक समुह गण्डकीमा सदस्य भएर काम गरेकी तारा प्रेस चौतारी नेपाल कास्कीकी उपाध्यक्ष हुन् ।
यो पुरस्कारबाट यसभन्दा अघि दुर्गा भण्डारी, दीपक परियार, शान्ति गुरुङ, सरिता तिम्सिना पगेनी, खेम सारु मगर, स्मिता अधिकारी, रोशनी गुरुङ, रविना आले र बिना कुमारी थापा ‘बिनु’ सम्मानित भइसकेका छन् ।
यसै कार्यक्रममा मीना सिर्जनशील समावेशी पत्रकारिता पुरस्कार २०७९ बाट पत्रकार बिना कुमारी थापा ‘बिनु’ पनि सम्मानित भएकी हुन् ।
