विश्व वातावरण दिवसमा ‘ग्रीनफोर्स क्लब–माछापुच्छ्रे’ को रचनात्मक कार्यक्रम

पोखरा, २२ जेठ । ५० औं विश्व वातावरण दिवसको अवसरमा कास्कीको माछापुच्छ्रे गाउँपालिका वडा नं. २, भुर्जुङखोला स्थित माछापुच्छ्रे माध्यमिक विद्यालयमा क्रियाशील विद्यार्थी समूह ‘ग्रीनफोर्स क्लव– माछापुच्छ्रे’ ले रचनात्मक कार्यक्रम गरेको छ ।

क्लबले विद्यार्थीलाई पूर्व सूचना गरी आफ्नो घर तथा वरपर रहेका फोहर सङ्कलन गरी बुझाउने प्रतियोगिता आयोजना गरेको थियो । सोहि क्रममा १०/१० जनाको ३० वटा समूहले ५ सय १९ किलो फोहोर सङ्कलन गरी आयोजक समक्ष बुझाएको ‘ग्रीनफोर्स क्लव– माछापुच्छ्रे’ की अध्यक्ष नम्रता गुरुङले बताइन् ।

प्रतियोगितामा विजयी समूहलाई अन्नपूर्ण संरक्षण क्षेत्र सार्दिखोला चेकपोस्टका प्रमुख श्रीकृष्ण न्यौपानेले पुरस्कार वितरण गरे । न्यौपानेले यस्ता कार्यले विद्यार्थी तथा अभिभावक सबैमा सचेतना थपिएको जानकारी दिँदै विद्यालयको रचनात्मक कामको खुलेर प्रशंसा गरे ।

माछापुच्छ्रे विद्यालयले प्रत्येक कक्षालाई भाषा, व्यवसाय, प्रकृति संरक्षण, नेतृत्व विकासलगायतका विभिन्न थिममा क्रियाशील गराइरहेको छ । विद्यालयका प्रधानाध्यापक सन्तोष आचार्यले विद्यार्थीलाई पाठ्यक्रमले तोकेका निर्धारित सक्षमतालाई सहयोग पुग्ने गरी प्रत्येक कक्षालाई छुट्टाछुट्टै थिममा सक्रिय बनाउँदा सिकाइसमेत प्रभावकारी बन्दै गइरहेको बताए ।

करिब सात सय विद्यार्थी नियमित अध्ययन गर्ने माछापुच्छ्रे मावि क्रियाकलापका आधारमा देशकै उदाहरणीय विद्यालय हो । विद्यालयका शैक्षिक गतिविधि अवलोकन गर्न देशका थुप्रै विद्यालय त्यहाँ पुग्ने गरेका छन् ।