पोखराका अनलाइन मिडियालाई वर्ल्डलिन्कको निःशुल्क ईन्टरनेट

पोखरा । ईन्टरनेट सेवा प्रदायक कम्पनी वर्ल्डलिन्क कम्युनिकेसन्स् लिमिटेडले पोखरामा सञ्चालित अनलाइन मिडियाहरुमा निःशुल्क ईन्टरनेट सुविधा प्रदान गर्ने भएको छ । अनलाइन पत्रकार संघ गण्डकी (ओजाग)को अगुवाईमा भएको यो सम्झौता अन्तर्गत पहिलो चरणमा ३० वटा अनलाइन मिडियाले यो सेवा उपभोग गर्नेछन् ।

वर्ल्डलिन्क र ओजागबीच सोमबार दुई पक्षीय सम्झौता भएको छ । वर्ल्डलिन्कको तर्फबाट गण्डकी प्रदेशका क्षेत्रीय बजार अधिकृत हेम गुरुङ र अनलाइन पत्रकार संघ गण्डकी प्रदेशको तर्फबाट अध्यक्ष कमल सुवेदीले हस्ताक्षर गरे ।

अनलाइन पत्रकार संघ गण्डकीले सिफारिस गरेका अनलाइन मिडियालाई वल्र्डलिंकले इन्टरनेट जडान सुविधा निःशुल्क रुपमा उपलब्ध गराउने सम्झौतापत्रमा उल्लेख छ । निःशुल्क इन्टरनेट उपलब्ध गराएबापत अनलाइन मिडियाहरुले वर्ल्डलिन्कको प्रचारात्मक सामाग्री प्रकाशन गर्नुपर्ने सम्झौतामा छ ।

वर्ल्डलिन्कका गण्डकी प्रदेश क्षेत्रीय बजार अधिकृत हेम गुरुङले मिडियासँग साझेदारी गर्दै आगामी कार्यक्रम तय गरिने जानकारी गराए । उनले पोखरा लगायत गण्डकी प्रदेश भित्र दर्ता भएका अनलाइन पोर्टलहरुलाई वर्ल्डलिन्कले निःशुल्क इन्टरनेट सुविधा उपलब्ध गराउने बताए । गुरुङले भने– ‘मिडियाका लागि इन्टरनेट र इन्टरनेटका लागि मिडिया भन्ने अभिप्रायले हामीले सामाजिक उत्तरदायित्व अन्तर्गत यो अभियान सञ्चालन गरेका हौं ।’

ओजागका अध्यक्ष सुवेदीले पहिलो चरणमा पोखराबाट संचालित ३० वटा अनलाइन पोर्टलहरुलाई वर्ल्डलिन्कले नि:शुल्क इन्टरनेट सुविधा उपलब्ध गराउने बताए । ‘हामीले पहिलो चरणमा पोखराबाट संचालित ३० वटा अनलाइन पोर्टलहरुलाई इन्टरनेट सुविधा उपलब्ध गराउने गरी सम्झौता गरेका छौं । – उनले भने, ‘वर्ल्डलिन्कसँग प्रदेशका अन्य जिल्लाबाट संचालित भएका अनलाइनहरुलाई पनि इन्टरनेट उपलब्ध गराइनेछ ।’ सुवेदीले वर्ल्डलिन्क मार्फत प्राप्त निःशुल्क इन्टरनेटका कारण खर्चमा कटौती हुने बताए ।

सो सम्झौता स्पेक्स् फोर्टीनको समन्वयमा गरिएको हो । स्पेक्स् फोर्टीनले पोखरा केन्द्रीत रहेर विज्ञापन एजेन्सी लगायत इभेण्ट म्यानेजमेण्टको काम गर्दै आएको छ ।