‘वी क्यान डु हेल्पीङ ह्याण्ड्स’ द्वारा शहिद दिवसमा दीप प्रज्वलन

आज माघ १६ गते शहिद दिवस । यस अवसरमा शहिदका सम्मानमा देशभर विभिन्न कार्यक्रम आयोजना भए । पोखरामा पनि दीप प्रज्वलन गरिएको छ । वी क्यान डु हेल्पीङ ह्याण्ड्सद्वारा सहिदहरुको सम्झनामा पोखराको मानव अधिकार चोकमा दीप प्रज्वलन गरेका गरिएको छ ।

प्रजातन्त्र स्थापनाका लागि प्राण आहुती दिने सहिदहरुप्रति सम्मान व्यक्त गर्दै सहिद संस्थाले उक्त कार्यक्रम आयोजना गरेको जनाएको छ । शहिदहरु शुक्रराज शास्त्री, धर्मभक्त माथेमा, दशरथ चन्द तथा गंगालाल श्रेष्ठलाई निरंकुश राणा शासनविरुद्ध क्रान्ति गरेकामा मृत्युदण्ड दिइएको थियो । त्यसैको सम्मानमा नेपालमा प्रत्येक वर्ष माघ १६ मा शहिद दिवस मनाइन्छ ।

सुवास पौडेलको अध्यक्षतामा सञ्चालन भएको उक्त कार्यक्रमा एक मिनेट मौन धारण गरेर शहिदहरुलाई सम्झना गरिएको हो । अध्यक्ष पौडेले शहिदहरुले जुन उद्देश्यका साथ आफ्नो रगतको बलिदान दिएका थिए, सात दशक पूरा हुँदा समेत पूरा हुन नसकेकोमा दुख व्यक्त गर्दै सबै मिलेर शहिदको सपना पूरा गर्नुपर्ने बताएका छन् ।

निःस्वार्थ भावनाले मानविय सेवामा समर्पित रहने गरी स्थापना भएको संस्थाले विभिन्न सामाजिक कार्यहरु गर्दै आएको छ । कार्यक्रमको सञ्चालन सचिव जीवन आचार्यले गरेका थिए ।