गण्डकी र लुम्बिनी प्रदेश जोड्ने कालीगण्डकी नदीको रामनदी (राम्दी) मा निर्माण भएको देशकै पहिलो नमुना ‘टाइड आर्च’ मोटरेबल पुल भारवहन क्षमता परीक्षणमा सुरक्षित देखिएको छ ।
पुल सेक्टर पोखराले गरेको परीक्षणका क्रममा पुलमा अधिकतम ३० मिलिमिटर मात्र लचकता देखिएको पुल सेक्टर पोखराका प्रमुख कृष्णप्रसाद अधिकारीले जानकारी दिए । उनका अनुसार पुलको डिजाइन भारवहन क्षमता १४६ टन रहे पनि एकैपटक २४० टनसम्म भार बोकेका सवारीसाधन आवतजावत गराउँदा पनि पुल सुरक्षित देखिएको हो ।
परीक्षणका क्रममा दुई, चार र छ वटा गरी विभिन्न चरणमा लोड गरिएका ट्रक पुलमा राखेर भारवहन क्षमता परीक्षण गरिएको अधिकारीले बताए । तापक्रमका कारण पनि पुलको भारवहन क्षमतामा केही फरक पर्न सक्ने भए पनि हालको अवस्था र परीक्षणबाट प्राप्त परिणामका आधारमा पुल पूर्ण रूपमा सुरक्षित देखिएको उनको भनाइ छ ।
पुल सेक्टर पोखराले निर्माण गरेको यो कंक्रिट फिल स्टिल ट्युब आर्च ब्रिज हो । थाइल्यान्डका डिजाइनरले यसको डिजाइन गरेका हुन् । यस्तो प्रविधिका पुल चीन र दुबईलगायतका स्थानमा निर्माण भए पनि नेपालमा भने राम्दीमा पहिलोपटक निर्माण गरिएको हो ।
एक स्पानमा निर्माण भएको नयाँ पुल १२० मिटर लामो र ११ मिटर चौडा छ । यो पुल २०२८ सालमा निर्माण भएको पुरानो ट्रस पुलभन्दा २७ मिटर लामो रहेको छ ।
तीन वर्षमा सक्ने सम्झौता, निर्माणमा ढिलाइ
नयाँ पुल निर्माणका लागि २०७९ असार ३० गते तीन वर्षमा काम सम्पन्न गर्ने गरी हिम सगरमाथा प्रालि, चितवनसँग ठेक्का सम्झौता भएको थियो । तर डिजाइन समयमै तयार नहुनु तथा निर्माण सामग्री भारत र आवश्यक विज्ञ चीनबाट समयमै नआउँदा पुल निर्माणमा ढिलाइ भएको हो ।
पुरानो ट्रस पुल जीर्ण हुँदै गएपछि भार बोकेका सवारीसाधन आवतजावतमा समस्या हुँदै आएको थियो । यही अवस्थालाई मध्यनजर गर्दै नयाँ पुल २७ करोड ७१ लाख नौ हजार छ सय रुपैयाँको लागतमा निर्माण गरिएको हो ।
नयाँ पुल सञ्चालनमा आएपछि जीर्ण पुरानो पुलमा जोखिम मोलेर यातायात सञ्चालन गर्नुपर्ने अवस्था अन्त्य भएको छ । यसअघि पुरानो पुलमा धेरै भार भएका सवारीसाधन आवतजावत गर्न कठिन हुने गरेकामा नयाँ पुलको भारवहन क्षमता परीक्षणसमेत सफल भएपछि यातायात सञ्चालन थप सहज हुने भएको छ ।
२०२८ सालमा बनेको थियो पुरानो पुल
राम्दीमा रहेको पुरानो ट्रस पुल सिद्धार्थ राजमार्ग निर्माणसँगै निर्माण सुरु गरिएको थियो । २०२२ सालमा निर्माण थालिएको पुल २०२८ सालमा सम्पन्न भएको थियो । तत्कालीन प्रधानमन्त्री कृतिनिधि विष्टले उक्त पुलको उद्घाटन गरेका थिए ।
लामो समयदेखि प्रयोगमा रहेको पुरानो पुल जीर्ण भएपछि त्यसको विकल्पका रूपमा निर्माण गरिएको नयाँ आर्च पुलले दुई प्रदेशबीचको आवागमनलाई थप सुरक्षित र सहज बनाउने अपेक्षा गरिएको छ ।
