स्याङ्जाको वालिङ नगरपालिकामा अवैध रूपमा कंक्रिट ओसारपसार गर्ने टिप्परलाई २५ हजार रुपैयाँ जरिवाना गरिएको छ ।
जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक रमेश दत्त अवस्थीका अनुसार गत बिहीबार राति करिब ९ बजे वडा प्रहरी कार्यालय वालिङबाट खटिएको प्रहरी टोलीले वालिङ नगरपालिका–९ नाकेडाँडास्थित वालिङ–हुवास भित्री सडकखण्डमा टिप्पर नियन्त्रणमा लिएको थियो ।
डुम्रे भञ्ज्याङबाट वालिङतर्फ आउँदै गरेको बा–प्र–०१००४ क ६७३६ नम्बरको टिप्परले ढुङ्गा, माटो र गिट्टी मिश्रित कंक्रिट अवैध रूपमा ओसारपसार गरिरहेको अवस्थामा फेला पारिएको प्रहरीले जनाएको छ ।
प्रहरीले नियन्त्रणमा लिएको टिप्परलाई आवश्यक अनुसन्धान तथा कानुनी कारबाहीका लागि सोमबार वालिङ नगरपालिकाको कार्यालयमा पठाएको थियो । नगरपालिकाले २५ हजार रुपैयाँ जरिवाना गरेपछि टिप्पर छाडिएको प्रहरीले जनाएको छ ।
