सातौँ कञ्चन पत्रकारिता पुरस्कार–२०८३ बाट स्याङ्जाका पत्रकार गोपालबहादुर जिटी सम्मानित भएका छन् । नेपाल आदिवासी जनजाति पत्रकार महासंघ (फोनिज) गण्डकीले आयोजना गरेको कार्यक्रममा कास्कीका पत्रकार खेम सारु मगरसँगै जिटीलाई नगद २५/२५ हजार रुपैयाँसहित सम्मानपत्र प्रदान गरिएको हो ।
स्वर्गीय वेदमान गुभाजू तथा स्वर्गीय नेत्रकुमारी गुभाजूको स्मृतिमा समाजसेवी तथा व्यवसायी बिमलमान गुभाजूद्वारा स्थापित उक्त पुरस्कार फोनिजको २७औँ स्थापना दिवसका अवसरमा अर्पण गरिएको हो । पुरस्कार कास्कीका प्रमुख जिल्ला अधिकारी कुमानसिंह गुरुङ, पुरस्कारदाता बिमलमान गुभाजूलगायतले संयुक्त रूपमा प्रदान गरेका थिए ।
सम्मान ग्रहणपछि पत्रकार गोपालबहादुर जिटीले पत्रिका वितरकका रूपमा आफ्नो व्यावसायिक यात्रा सुरु गर्दै पत्रकारितामा प्रवेश गरेको स्मरण गर्दै यो सम्मानले अझ जिम्मेवार र सक्रिय भएर काम गर्न थप ऊर्जा मिलेको बताए । उनले पुरस्कारलाई व्यक्तिगत उपलब्धिभन्दा पनि पत्रकारिता पेशाप्रतिको सम्मानका रूपमा लिएको उल्लेख गरे ।
अर्का सम्मानित पत्रकार खेम सारु मगरले पत्रकारितामा बिताएको तीन दशक लामो यात्रालाई सम्झँदै यस्तो सम्मान आफ्नो लागि प्रेरणादायी भएको प्रतिक्रिया दिए ।
कार्यक्रमलाई सम्बोधन गर्दै कास्कीका प्रमुख जिल्ला अधिकारी कुमानसिंह गुरुङले प्रशासन र सञ्चार क्षेत्रबीचको सहकार्य आवश्यक रहेको बताए । जिल्लाका संवेदनशील विषयमा तथ्यपरक र जिम्मेवार पत्रकारिताको आवश्यकता औँल्याउँदै आगामी दिनमा पनि पत्रकारहरूसँग सहकार्य गरेर अघि बढ्ने प्रतिबद्धता व्यक्त गरे ।
सोही कार्यक्रममा नवनियुक्त पोखरा प्रज्ञा प्रतिष्ठानका उपकुलपति तिलप्रसाद पुन ‘तिलक’, गण्डकी प्रज्ञा प्रतिष्ठानका सदस्य कमलप्रसाद पौडेल, पोखरा प्रज्ञा प्रतिष्ठानका सदस्य तथा लेखक रविन्द्र माकाजू र पुरस्कारदाता बिमलमान गुभाजूलाई समेत सम्मान गरिएको थियो ।
कार्यक्रममा प्रज्ञा प्रतिष्ठान कास्कीका परिषद् सदस्य रविन्द्र माकाजूले स्वर्गीय वेदमान गुभाजू र नेत्रकुमारी गुभाजूको योगदानबारे प्रकाश पारेका थिए भने फोनिज गण्डकीका संघीय सल्लाहकार शान्ति गुरुङले सम्मानित पत्रकारहरूको परिचय प्रस्तुत गरेकी थिइन् ।
सम्मानित पत्रकार खेम सारु मगर विगत तीन दशकदेखि पोखरामा पत्रकारितामा सक्रिय छन् भने गोपालबहादुर जिटी दुई दशकदेखि स्याङ्जामा पत्रकारिता गर्दै आएका छन् ।
यसअघि कञ्चन पत्रकारिता पुरस्कारबाट कास्कीका रुद्रबहादुर थापा मगर, शान्ति गुरुङ, उदयबहादुर अमात्य, हुमबहादुर तमु, दीपेन्द्र श्रेष्ठ र राम गुरुङ, बाग्लुङका राजेशचन्द्र राजभण्डारी, नवलपुरका केभी राना मगर र कमला राना मगर, लमजुङका आश गुरुङ, मुस्ताङका सुन्दरकुमार थकाली तथा गोरखाका कैलाशबाबु श्रेष्ठ सम्मानित भइसकेका छन् ।
फोनिज गण्डकीकी अध्यक्ष खिमा गुरुङको अध्यक्षतामा सम्पन्न कार्यक्रमको सञ्चालन महासचिव सुरज थापामगरले गरेका थिए ।
