समाजसेवी डा. मनोरदिन सैयदले स्याङ्जाको भीरकोट नगरपालिका–२ स्थित ध्रुव देउराली आधारभूत विद्यालयलाई दुई थान कम्प्युटर सेट उपलब्ध गराएका छन् । उनले विद्यालयमा डिजिटल माध्यमबाट पठनपाठन सहज बनाउने उद्देश्यसहित सहयोग गरेका हुन् ।
डा. सैयदले विद्यालयका प्रधानाध्यापक पदमपाणी अर्याल र विद्यालय व्यवस्थापन समितिका अध्यक्ष मोहमद हनिफ मियालाई कम्प्युटर हस्तान्तरण गरेका हुन् ।
सहयोग हस्तान्तरणपछि डा. सैयदले सानो प्रयासले पनि विद्यालयको शैक्षिक वातावरण सुधारमा योगदान पुग्ने विश्वास व्यक्त गर्दै आगामी दिनमा पनि साथ रहने बताए ।
विद्यालयका प्रधानाध्यापक अर्यालले प्राप्त कम्प्युटरमार्फत विद्यालयमा कम्प्युटर शिक्षा सुरु गर्ने तयारी गरिएको जानकारी दिए । उनले विद्यालयको आवश्यकतामा सहयोग पुर्याएको भन्दै डा. सैयदप्रति आभार व्यक्त गरेका छन् ।
भीरकोट–२ स्थित बलामडाँडामा रहेको उक्त विद्यालयमा हाल ३५ जना विद्यार्थी अध्ययनरत छन् ।
यसअघि पनि भीरकोट क्षेत्रका विद्यार्थीलाई पोशाक तथा विभिन्न शैक्षिक सामग्री उपलब्ध गराउँदै आएका सैयदले शिक्षा क्षेत्रमा निरन्तर सहयोग गर्दै आएका छन् ।
भीरकोट नगरपालिका–१ का स्थायी बासिन्दा डा. सैयद हाल काठमाडौँस्थित मनमोहन मेमोरियल अस्पतालमा कार्यरत छन् ।
