नकवजनी चोरी मुद्दामा अदालतबाट सजाय तोकिएपछि लामो समय फरार रहेका एक जना कसूरदार १८ वर्षपछि पक्राउ परेका छन् ।
जिल्ला प्रहरी कार्यालय स्याङ्जाबाट खटिएको विशेष अप्रेसन टोलीले बुधबार फरार रहेका कसूरदारलाई पक्राउ गरेको प्रहरी निरीक्षक अमृत त्रिपाठीले जानकारी दिए ।
पक्राउ पर्नेमा पुतलीबजार नगरपालिका–१४ सतौंका ३८ वर्षीय नारायण लामिछाने रहेका छन् । उनी पूर्ण बहादुर लामिछाने नामले समेत परिचित रहेको प्रहरीले जनाएको छ ।
प्रहरीका अनुसार २०६४ वैशाख २१ गते भएको नकवजनी चोरी घटनामा स्याङ्जा जिल्ला अदालतले उनलाई २२ दिन कैद र ६ हजार रुपैयाँ जरिवाना सजाय सुनाएको थियो । अदालतको फैसला कार्यान्वयन हुन बाँकी रहँदै उनी फरार रहेका थिए ।
विशेष टोलीले उनलाई पुतलीबजार नगरपालिका–१ प्रगतिनगरबाट पक्राउ गरेको प्रहरी निरीक्षक त्रिपाठीले बताए ।
अनुसन्धानका क्रममा उनले आफूले गरेको कसूर लुकाउन नारायण लामिछाने नाम प्रयोग गरे पनि नागरिकताको प्रमाणपत्र भने पूर्ण बहादुर लामिछाने नाममा लिएको तथ्य खुलेको प्रहरी निरीक्षक त्रिपाठीले जानकारी दिए ।
पक्राउ परेका उनलाई कैद भुक्तान र जरिवाना असुलउपरका लागि बुधबार नै स्याङ्जा जिल्ला अदालतमा पेश गरिएको जिल्ला प्रहरी कार्यालय स्याङ्जाले जनाएको छ ।
