स्याङ्जाको वालिङ नगरपालिकामा बुधबारदेखि नवौं संस्करणको वालिङ महोत्सव सुरु भएको छ । वालिङस्थित मालेबगर खेल मैदानमा आयोजना गरिएको गण्डकी प्रदेशस्तरीय महोत्सव ‘हाम्रो गौरव हाम्रो शान, वालिङ महोत्सव हाम्रो पहिचान’ भन्ने मूल नारासहित सञ्चालनमा आएको हो ।
महोत्सवको उद्घाटन नेपाल उद्योग वाणिज्य महासंघका अध्यक्ष चन्द्रप्रसाद ढकालले गरेका हुन् । उद्घाटन कार्यक्रममा बोल्दै उनले यस्ता महोत्सवले स्थानीय उत्पादनको प्रवर्द्धनसँगै व्यापारिक गतिविधि बढाउन सहयोग पुग्ने बताए ।
महोत्सवमा कृषि, हस्तकला, सेवा, औद्योगिक तथा व्यापारिक क्षेत्रका विभिन्न स्टलहरू राखिएका छन् । कृषि, कृषि औजार तथा हस्तकलासम्बन्धी ४० भन्दा बढी स्टल निःशुल्क उपलब्ध गराइएको छ भने स्थानीय व्यापारीहरूका लागि ३० प्रतिशत छुटको व्यवस्था गरिएको आयोजक वालिङ उद्योग वाणिज्य संघका अध्यक्ष चेतनारायण श्रेष्ठले बताए ।
महोत्सवबाट एक करोड ६८ लाख रुपैयाँ आम्दानी हुने अनुमान गरिएको संघका सचिव तथा महोत्सव प्रचारप्रसार समितिका संयोजक पिताम्बर खनालले जानकारी दिए । महोत्सव सञ्चालनका लागि एक करोड १४ लाख ५१ हजार रुपैयाँ खर्च हुने र ५३ लाख ४९ हजार रुपैयाँ बचत हुने अपेक्षा गरिएको उनको भनाइ छ ।
नवौं वालिङ महोत्सवमा करिब १० करोड रुपैयाँ बराबरको अल्पकालीन कारोबार हुने र तीन लाख दर्शक भित्र्याउने लक्ष्य लिइएको छ । गण्डकी प्रदेशकै उत्कृष्ट महोत्सवका रूपमा चिनिँदै आएको यो महोत्सव माघ २५ गतेसम्म १२ दिन सञ्चालन हुने आयोजकले जनाएको छ ।
