स्याङ्जाको बिरुवा गाउँपालिकाले सामुदायिक विद्यालयका विद्यार्थीका लागि दिवा खाजामा थप सहयोग उपलब्ध गराएको छ । गाउँपालिकाले कक्षा पाँचसम्म अध्ययनरत विद्यार्थीलाई प्रतिदिन पाँच रुपैयाँ थप अनुदान दिएर दिवा खाजाको दर २५ रुपैयाँ पुर्याएको हो ।
यसअनुसार पालिकाभित्रका ३२ वटा विद्यालयमा अध्ययनरत ५५४ जना विद्यार्थी लाभान्वित भएका छन् । संघीय सरकारले उपलब्ध गराउँदै आएको २० रुपैयाँमा पालिकाले थप रकम जोडेपछि विद्यालयमै नियमित रूपमा खाजा खुवाउने व्यवस्था मिलाइएको हो ।
विद्यालयमा विद्यार्थीको उपस्थिति बढाउने र बालबालिकाको पोषण अवस्था सुधार्ने उद्देश्यले कार्यक्रम अघि बढाइएको गाउँपालिकाका प्रमुख प्रशासकीय अधिकृत पर्शुराम उपाध्यायले जानकारी दिए । अनुदान रकम सम्बन्धित विद्यालयमार्फत विद्यार्थीको दिवा खाजामै खर्च भइरहेको उपाध्यायले बताए ।
शिक्षासँगै बालबालिकाको स्वास्थ्यमा ध्यान दिनु स्थानीय सरकारको दायित्व भएको बताउँदै गाउँपालिका अध्यक्ष सूर्यबहादुर कुँवरले सानो देखिए पनि यस सहयोगले विद्यार्थीलाई विद्यालयमा टिकाइराख्न र पोषणमा सकारात्मक प्रभाव पार्ने विश्वास रहेको बताए ।
कार्यक्रम कार्यान्वयनमा पारदर्शिता अपनाइएको उल्लेख गर्दै अध्यक्ष कुँवरले अनुदान रकम सही प्रयोजनमा खर्च होस् भनेर नियमित अनुगमन गरिँदै आएको बताए । शिक्षाको गुणस्तर सुधारका लागि यस्ता कार्यक्रमलाई निरन्तरता दिने योजना रहेको उनले बताए ।
पालिकाले हाजिरीको आधारमा बढीमा एक विद्यार्थीका लागि १८० दिनसम्म खाजा खर्च व्यवस्थापन गर्दै कुल चार लाख ९८ हजार ६ सय रुपैयाँ विनियोजन गरेको छ । पहिले संघीय सरकारले दिएको खाजा खर्च अभिभावकले लैजाने गरेकामा अहिले पालिकाको थप सहयोगपछि विद्यालयमै दैनिक तालिका बनाएर खाजा खुवाउने गरिएको छ । गाउँपालिकाको यो निर्णयलाई अभिभावक र विद्यालय प्रशासनले सकारात्मक रूपमा लिएका छन् ।
