स्याङ्जाको दक्षिणी भेग चापाकोटमा ‘तेस्रो चापाकोट महोत्सव–२०८२’ का लागि सबै तयारी पूरा भएको छ । पुस २५ गतेदेखि माघ ६ गतेसम्म सञ्चालन हुने महोत्सवको उद्घाटन गण्डकी प्रदेश सरकारका अर्थमन्त्री डा. टकराज गुरुङले गर्ने कार्यक्रम तय भएको पत्रकार सम्मेलनमार्फत जानकारी दिइएको छ ।
कालीगण्डकी नदीको किनारमा रहेको चापाकोट नगरपालिका–९ स्थित गंगालाल माध्यमिक विद्यालयको खेलमैदानमा महोत्सव सञ्चालन हुँदैछ । ‘हाम्रो मान हाम्रो शान, सुन्दर नगर हाम्रो पहिचान’ भन्ने भावनालाई आत्मसाथ गर्दै चापाकोट उद्योग वाणिज्य संघको आयोजनामा नगरस्तरीय कृषि, पर्यटन, सांस्कृतिक तथा औद्योगिक व्यापार मेलाका रूपमा महोत्सव गर्न लागिएको हो ।
स्थानीय उत्पादनको प्रवर्द्धन, पर्यटन विकास र आर्थिक गतिविधिलाई चलायमान बनाउने उद्देश्यले महोत्सव आयोजना गरिएको संघका अध्यक्ष निर्मल राना मगरले बताए । महोत्सवमा कृषि उत्पादन तथा पशुपंक्षी प्रदर्शनी, औद्योगिक तथा व्यापारिक स्टल, हस्तकला तथा पर्यटन फोटो प्रदर्शनी, अटोमोबाइल प्रदर्शनीलगायत कार्यक्रम समेटिएका छन् ।
सांस्कृतिक कार्यक्रमअन्तर्गत स्थानीय जातजातिको कला र संस्कृतिलाई प्रस्तुत गरिनेछ । भजन–कीर्तन, रत्यौली, मावि तहको हाजिरीजवाफ प्रतियोगिता तथा ‘तेस्रो चापाकोट डान्स आइडल’ पनि महोत्सवका आकर्षण हुनेछन् ।
बालबालिकाका लागि बाल उद्यान, राष्ट्रिय तथा स्थानीय कलाकारको प्रस्तुति, कृषि विज्ञ र अगुवा किसानबीच अन्तरक्रिया कार्यक्रमसमेत राखिएको आयोजकले जनाएको छ । आकर्षक प्रवेशद्वारसँगै लन्डन ब्रिज र इफिल टावरको संरचना, गण्डकी बेसिका रमणीय स्थलको हेलिकप्टर दृश्यावलोकन, कालीगण्डकीमा जलयात्रा र उपयुक्त स्थानबाट प्याराग्लाइडिङमार्फत महोत्सव अवलोकन गर्ने व्यवस्था मिलाइने आयोजक संघले बताएको छ ।
करिब २५० स्टल रहने अनुमान गरिएको महोत्सवमा एक लाखभन्दा बढी दर्शक भित्र्याउने र एक करोड रुपैयाँसम्मको आर्थिक कारोबार गर्ने लक्ष्य राखिएको छ । सुरक्षालाई प्राथमिकतामा राख्दै बीमाको व्यवस्था पनि गरिएको आयोजकले जनाएको छ ।
प्रवेश शुल्क साधारणतर्फ १०० रुपैयाँ र विद्यार्थीका लागि ७० रुपैयाँ तोकिएको छ भने व्यक्तिगत तथा व्यवसायिक पास ६०० रुपैयाँमा उपलब्ध हुनेछ । महोत्सवबाट संकलित आम्दानी व्यवसायिक हितकोष, खेलमैदान व्यवस्थापन, शैक्षिक पुरस्कार तथा छात्रवृत्ति र संघको भवन निर्माणमा खर्च गर्ने लक्ष्य लिइएको छ ।
